Rreth 350 forca policie mes të cilëve RENEA dhe FNSH janë nisur drejt fshatit Grudë e Re për të bërë të mundur arrestimin e 20 vjeçarit Sokol Mjacaj, lindur dhe banues në fshatin Lotaj të Dukagjinit, si i dyshuari kryesor i vrasjes së dy turistëve çekë mbrëmjen e së premtes.
Mësohet se policia ka kryer verifikimet e duhura dhe tashmë ka dyshime të forta se 20 vjeçari është autori i ngjarjes tragjike.
Një akuzë e tillë është e vërtetuar shkencërisht përmes gjurmëve në brendësi të makinës. Sipas policisë autori ka pasur qëllim grabitjen e makinës. Në një operacion të nisur nga mbrëmja e djeshme policia është duke kërkuar për 20-vjeçarin në zonën e Grudës. “Policia i bën thirrje banorëve të mos strehojnë autorin dhe të kontribuojnë në kapjen e tij”, – thuhet në njoftimin e policisë.
Edhe pse 20 vjeç Mjacaj, sipas policisë është me rrezikshmëri të lartë. Ai është i dënuar më parë për vjedhje me pasojë vdekjen e një fëmije në bashkëpunim në vitin 2010. I riu ka bërë pesë vjet burg dhe ka dalë nga burgu para një muaji.
