Eksperti për çështjet e sigurisë, Fatjon Softa ka deklaruar në studion e emisionit “3D” të moderatorit Alban Dudushit, në RTSH1 se larjet e hesapeve po bëhen në Belgjikë, ndërsa shpjegoi se pse erdhi prokurorja belge në Tiranë.
“Së pari, Belgjika është vendi ku aplikacioni Sky Enchrochat është zbërthyer dhe ka informuar SPAK-un me dosje dhe ku ka ndihmuar shumë nga zbardhja e këtyre përgjimeve për të krijuar te SPAK-u një lloj procedimi ndaj grupeve kriminale.
E dyta, është rritja e agresivitetit të grupeve kriminale dhe shqetësimit ndaj tyre sepse edhe larja e hesapeve po i bëjnë në këto territore. E treta, është një linjë bashkëpunimi midis Shqipërisë dhe Belgjikës, të cilët kanë një aktivitet kriminal të avancuar. Shqipëria është sot vendi ku ka pastrim parash.
Kujtojmë që edhe Toyota Yaris erdhi nga ai vend dhe në atë kohë kemi pasur një vizitë të prokurorëve belgë ku janë takuar me ish-kryetarin e Partisë Demokratike, Lulzim Basha që bëri atë deklaratë, pak të çuditshme në Parlament. Mënyra se si dekonspirua dhe u tha, nuk kemi ne informacion. Mendoj se çështjet vazhdojnë”, u shpreh Softa.
Ai vuri në dukje se midis Shqipërisë dhe Belgjikës janë ngritur grupe të përbashkëta hetimore për të luftuar krimin e organizuar.
“Janë ngritur grupe të përbashkëta hetimore midis atyre shqiptare dhe belge në luftën e përbashkët ndaj grupeve kriminale që ushtrojnë aktivitet në territorin belg por jo vetëm, por edhe pastrimi i parave, apo paratë që ato sjellin nga Belgjika dhe aktivitetet që ato kryejnë të lidhura me bandat dhe grupet e huaja që veprojnë në ato territore. Kjo lloj linje është e rëndësishme për të luftuar bashkërisht krimin e organizuar që po godet edhe këtë vend të Bashkimit Evropian”, tha Softa.
/a.r
