Socialistët po bëhen gati për të nxjerrë propozimin e tyre për emrin e Presidentit të ri të Republikës. Ashtu siç u njoftua një ditë më parë, Partia Socialiste do të mbledhë Grupin Parlamentar, ku pritet që dorëzohen edhe emrat e propozuar për kreun e Shtetit.
Një ditë më parë kreu i Grupit Parlamentar të PS-së, Taulant Balla, njoftoi se është ngritur një grup pune që do të zhvillojë konsultimet me grupet e tjera e parlamentare në Kuvend, për të përzgjedhur një emër konsensual, ku të mërkurën pritet të takohet me opozitën. Megjithatë sipas Ballës kontaktet me opozitën do të nisin që ditën e sotme. PS ka mandatuar Taulant Ballën, Elisa Spiropalin dhe Damian Gjiknurin për procesin e zgjedhjes së presidentit të ri të vendit.
Procedura parlamentare për përzgjedhjen e kreut të ri të shtetit do të nisë në 29 prill, me mbajtjen e Konferencës së Kryetarëve. Sakaq me 20 prill, shumica ka thirrur për konsultime 3 grupet parlamentare të opozitës. Në këto konsultime do të mungojë Komisioni i Rithemelimit dhe ata të LSI pasi nuk kanë grupe parlamentare në Kuvend.
Por pavarësisht se do të negociohet me qëllimin e gjetjes së një figure konsensuale, edhe pse i kanë votat për ta zgjedhur të vetëm presidentin e ri, socialistët e bëjnë të qartë se nuk do të pranojnë një kandidat që vjen nga radhët e opozitës.
Nga ana tjetër, sot përmbyllet procesi i dorëzimit të kandidaturave nga deputetë socialistë, që do t’i sjellin 3 propozimet e tyre në mbledhjen e grupit në zarf të mbyllur. Ndërkohë që pjesë e procesit të konsultimit do të jenë dhe shoqëria civile si dhe vetë qytetarët, që socialistët i ftojnë të shprehin preferencat e tyre për kandidatët për president përmes postes elektronike.
Socialistët kanë propozuar që seanca e parë, nga 5 seanca që parashikon Kushtetuta për zgjedhjen e Presidentit, të zhvillohet në datën 4 maj.
Ilir Meta do të jetë në krye të Presidencës deri më 24 korrik 2022, ndërsa Kuvendi duhet të nis procesin e zgjedhjes së tij jo më vonë se 24 maji 2022 sipas Kushtetutës.
g.kosovari
