Apple dhe Samsung, që do të zbulojnë në të ardhmen smartfonët e rinj, janë gjithmonë në kërkim të formulës magjike për të ruajtur dominimin e tyre përballë konkurencës kineze, në sfondin e ngadalësimit të tregut.
Beteja është e madhe për Apple, që kërkon të ruajë imazhin e kryeinovatorit. Por, grupi amerikan ka pasur vështirësi këto vitet e fundit për të prezantuar funksione të reja revolucionare për “iPhone”, kopja e parë e të cilit daton në qershor 2007 dhe që është shitur në më shumë se 1,2 miliardë kopje.
“Është e dukshme që Apple kërkon të bëjë diçka ndryshe për 10-vjetorin e “iPhone’”, thekson analisti, Stephen Baker nga kabineti i NPD Group.
Numri një i tregut, koreano-jugori Samsung, do të publikojë gjithashtu të mërkurën “Galaxy Note 8”, një lançim po aq i pritur sa modeli i mëparshëm që u bë objekt i një rikthimi për shkak të rasteve të shpërthimit të baterive.
Sipas zërave të fundit, “iPhone” i ri do të pajiset me një ekran që zë të gjithë sipërfaqen e telefonit, me një vend të caktuar për një aparat fotografik shtesë duke mundësuar njohjen fytyrën në 3D.
“iPhone 8” do të ketë një mbulesë xhami prapa dhe të mundësojë karikimin pa fishë.
“Pritet të ketë një rinovim të rëndësishëm dizanjesh tek Apple”, thekson Avi Greengart, analist tek GlobalData.
“Kjo është një çështje e ndjeshme, kryesisht në Kinë. Njerëzit kërkojnë prodhimin e një aparati që reflekton statusin e tyre social dhe duhet që ai të dallohet nga një telefon kinez Huawei apo Xiaomi, dhe mendoj se ky do të jetë rasti”, vijon ai.
Apple ka humbur terren në Kinë, ku qarkullimi i tij është ulur me 10 për qind në tremujorin e fundit krahasur të njëjtën periudhë të vitit të kaluar.
IDC vazhdon të vendosë Samsung dhe Apple në krye, me respektivisht 23,3 përqind dhe 12 për qind të shitjeve, pa shumë ndryshim./b.d
