U luajtën sot, në të njëjtin orar (13:00), ndeshjet e javës së 16-të të Superiores, që janë edhe të fundit për vitin 2017. Skuadrat tashmë do të marrin pushimet dimërore, do të vijojnë me fazat përgatitore, brenda dhe jashtë vendit, ndërsa do të bëjnë çmos të përforcojnë veten në merkaton e janarit. Në pesë stadiume të vendit pati mjaft emocione në këtë “stacion” të garës, sepse golat dhe përmbysjet nuk munguan. Suprprizën më të madhe e ka bërë Luftëtari. Skuadra gjirokastrite, që shkërmoqi 5-0 Partizanin në javën e shkuar, ia ka dalë mbanë edhe ndaj kampionëve të vendit në fuqi. Kësaj here në transfertë, në “Zeqir Ymeri”. Bluzinjtë kanë fituar 2-1, me gola të Abazajt dhe Rrocës, ndërsa “rrjeta” e Bakajt me penallti vetëm sa e hapi dhe e intrigoi këtë ballafaqim, por nuk shërbeu as për të barazuar, jo më më tepër.
Me rezultatin 3-1 ka fituar Partizani ndaj Vllaznisë. Ka qenë Ibrahimi, që ka zhbllokuar shifrat e bardhë që në dhjetë minutat e para, ndërkohë që brenda dy minutash ka barazuar Cinari për miqtë. Në pjesën e dytë, pas një gabimi në prapavijë të shkodranëve, ka qenë Progni, ai që ka realizuar golin e dytë, para se Bardhi të vuloste fitoren për “demat e kuq”. Flamurtari ka shokuar Kamzën në shtëpi. Kuqezinjtë e Shpëtim Duros kanë shënuar dy gola në këtë transfertë, me anë të Hoxhajt dhe Juffos, në pjesën e parë, ndërkohë që në 45 minutat e dytanë ka krijuar mundësi të tjera konkludimi, por kanë festuar golin e tretë në kohën shtesë, kur Tangara ka mbyllur gjithçka. Vendi i dytë për bregdetarët e Vlorës në klasifikim, ndërsa debutuesit në Superiore, kamzalinjtë, që ishin konsideruar me të drejtë si “Hirushja” e Superiores, pësojnë humbjen e dytë radhazi dhe ngrenë alarmin e një krize në këtë fundviti.
Fitore të djersitur, edhe pse me raste pa fund, ka marrë Skënderbeu në shtëpi. Heroi dhe shpëtimtari i korçarëve ka qenë sulmuesi Soue, që ka shënuar dy herë, duke përmbysur disavantazhin e hershëm të minutës së 20-të, kur Dedic për durrsakët finalizonte nga penalltia. Xhejms do të vuloste gjithçka në këtë sfidë, në minutën e 85-të. Fitore ka marrë edhe Laçi i Gentian Mezanit në shtëpi. Ndaj Lushnjës së vendit të fundit, kurbinasit kanë demonstruar njëfarë euforie nga ecuria tejet pozitive e tyre në këtë fazë të dytë, ndaj e kanë mbyllur pjesën e parë në barazimin 1-1. Fillimisht ka shënuar Rexhinaldo për bardhezinjtë, pastaj ka barazuar Sefa për lagunarët. Në pjesën e dytë ka dalë në skenë beratasi Uzuni, që ka realizuar për epërsinë 2-1, ndërkohë që Xhixha ka trefishuar rezultatin në kohën shtesë, duke shtuar edhe tri pikë të tjera me shumë vlera për kurbinasit.
PARTIZANI-VLLAZNIA 3-1
Golat: Ibrahimi 9’, Progni 66’, Bardhi 83’ / Cinari 11’
Gjyqtarë: Eldorjan Hamiti, Ridiger Cokaj, Paulin Simoni
SKENDERBEU-TEUTA 3-1
Golat: Soue 34’, 82’, Xhejms 85’ / Dedic 20’ (pen)
Gjyqtarë: Ardian Beqiri, Egin Doda, Dojando Myftari
KUKESI-LUFTETARI 1-2
Golat: Bakaj 65’ (pen) / Abazaj 45’, Rroca 50’
Gjyqtarë: Remzi Sadiku, Rudin Preca, Astrit Mahmuti
KAMZA-FLAMURTARI 0-3
Golat: Hoxhaj 21’, Juffo 44’, Tangara 90+3’
Gjyqtarë: Emirion Sino, Ilir Tartari, Orgest Grabova
LACI-LUSHNJA 3-1
Golat: Rexhinaldo 1’, Uzuni 77’, Xhixha 91’ / Sefa 42’
Gjyqtarë: Klajdi Kola, Ermal Barushi, Rejdi Avdo
/Telesport/a.m.
