Drejtuesit e operacionit të Lazaratit si dhe prokurori i Krimeve të Rënda, Adnan Xholi, kanë rindërtuar skenën e ngjarjes.
Furgoni tip “Volkswagen” i forcave speciale brenda të cilit u qëllua për vdekje efektivi Ibrahim Basha, është sjellë sërish në vendngjarje, duke u vendosur saktësisht në vendin ku ndodhej në momentin e sulmit.
Ndërsa në krah të tij duket qartësisht avllia prej blloqesh betoni që ishte shembur më parë nga grupi i armatosur, në një gjatësi prej afro 100 metrash, në krahun e djathtë të rrugës, në ngjitje drejt fshatit Lazarat.
Sipas ekspertëve në vendin e ngjarjes, avllia është shembur me një makinë të rëndë tip “Saurrel”, me qëllim për të krijuar fushëpamjen e nevojshme për të sulmuar me armë Policinë.
Ndërsa qindra metra më tej, në vijë tokësore dhe thuajse 200 metra në vijë ajrore, është fiksuar vendi nga ku është hapur zjarr ndaj forcave speciale.
Ky vend ndodhet në një rrugicë në të dy krahët e së cilës ka avlli shtëpie. Në pjesën e poshtme të kësaj rrugice, ku ndodhet i pozicionuar memoriali i Sabri Shurdhit, i vrarë në vitin 2007, grupi i armatosur kishte krijuar pozicionet e volitshme për të qëlluar.
Në murin prej blloqesh betoni, autorët kishin krijuar hapësira duke hequr disa prej blloqeve, në mënyrë që të nxirrnin tytat e armëve dhe vetë të ishin të kamufluar.
Disa metra përgjatë këtij muri avllie, janë gjetur dhjetëra gëzhoja që tashmë janë sekuestruar në cilësinë e provës materiale. Saktësisht, grupi hetimor thotë se përgjatë këtij muri janë fiksuar 10 vende nga ku është qëlluar dhe janë gjetur rreth 100 gëzhoja.
