Presidenti i Shteteve të Bashkuara, Donald Trump, deklaroi se vendi po prodhon më shumë “armë elitare dhe të përsosura se kurrë më parë në histori”, duke konfirmuar se këto sisteme po dërgohen çdo ditë për trupat ushtarake amerikane në Lindjen e Mesme dhe rajone të tjera.
Përmes një postimi në rrjetin e tij social Truth Social, Trump bëri me dije se sapo kishte marrë një raport zyrtar mbi ecurinë e prodhimit ushtarak në SHBA.
Sipas presidentit amerikan, industritë e mbrojtjes në vend po punojnë pa ndërprerje.
“Uzinat e kompanive tona të mbrojtjes po punojnë 24 orë në ditë, 7 ditë të javës. Në të njëjtën kohë, ato po ndërtojnë mesatarisht nga 4 deri në 5 fabrika të reja me shkallë të gjerë secila!”, shkruan Trump.
Trump specifikoi se vëmendja kryesore e këtij prodhimi masiv është përqendruar në sisteme të avancuara të mbrojtjes ajrore dhe raketore, si dhe raketat me rreze të gjatë.
Presidenti shtoi se SHBA-ja disponon tashmë një sasi të madhe stoku nga këto armatime, ndërsa furnizimet e reja po dërgohen në mënyrë të vazhdueshme pranë forcave të armatosura amerikane në Lindjen e Mesme.
