Mediat në Kosovë e cilësojnë një skandal emërtesën YU, Jugosllavi, në faqen zyrtare të Aeroportit Ndërkombëtar “Nënë Tereza” në Tiranë.
Mjafton të klikosh për të parë orarin e fluturimeve nga dhe drejt Kosovës dhe në krah të emrit të kryeqytetit, Prishtinë, në kllapa vendi i origjinës nuk është me shkurtesën KS, Kosovë, por Yu, Jugosllavi.
Edhe pse Kosova prej shtatë vitesh është shtet i pavarur dhe prej dy dekadash Jugosllavia ka pushuar së ekzistuari, në portalin zyrtar të Aeroportit Ndërkombëtar “Nënë Tereza”, Prishtina nuk identifikohet si qytet i Kosovës por ish-Jugosllavisë.
Në denoncimin e bërë nga mediat në Kosovë, “Ekspres” dhe “Telegraf”, shkruajnë se Aeroporti Nënë Tereza ende e konsideron Prishtinën, kryeqytetin e Kosovës, pjesë të ish–Jugosllavisë.
Për këtë ngjarje ka reaguar edhe deputeti socialist Namik Dokle.
Në një postim në Facebook, Dokle shkruan:
“Turp! Turp! Turp!
Nuk e kam zakon që të postoj dy statuse në një dite, por sot më detyroi reagimin një veprim i turpshëm i aeroportit të Rinasit që në dokumentet e tij të udhëtimit e konsideron Prishtinën akoma si pjesë të Jugosllavisë!
Cilado qofte arsyeja, injoranca, kodoshllëku burokratik apo interesa të ndyra tregtare(!!!) ky është një absurditet i turpshëm, treqind herë i turpshëm!”.