Kryetari i bashkisë së Moskës, Sergei Sobyanin, ka njoftuar përmes një postimi në Telegram se “në Moskë është shpallur një regjim operacioni kundër terrorizmit”. Ai ka bërë me dije se e hëna do të jetë një ditë pushim për minimizimin e rreziqeve”.
“Situata është e vështirë,” tha kryebashkiaku, duke shtuar se ka mundësi që disa rrugë apo lagje në qytet do të mbyllen për qarkullim.
Ai u kërkoi moskovitëve që “të kufizojnë udhëtimet nëpër qytet sa më shumë që të jetë e mundur”.
Gjithashtu informoi qytetarët se shërbimet e qytetit janë në gatishmëri të lartë.
Deklrata e kryebashkiakut të Moskës vjen në një kohë kur mercenarët e Wagner duket se po lëvizin në veri nga rajonet qendrore të Rusisë, në drejtim të kryeqytetit.
Shefi i Wagner-it, Yevgney Prigozhin, nisi një rebelim ushtarak kundër Kremlinit gjatë natës së të premtes me autokolonën e forcave të armatosur që pretendon se ka marrë 2 baza të armatosura të rëndësishme në Rusi.
Putin iu drejtua popullit rus të shtunën, duke paralajmëruar se udhëheqësi ushtarak e kishte ‘goditur me thikë pas shpine’, ndërsa Moska përgatitet të futet në rrethim, me trupat ushtarake që po pozicionohen për të mbrojtur qytetin.
Në kryeqytetin rus janë pozicionuar postbllokët e mitralozëve si dhe mjetet e blinduara për të ndaluar hyrjen e Wagner në qytet.
Të gjitha pamjet që vijnë nga kryeqyteti rus japin pamje se do të kemi një përplasje të armatosur.
