Në luftën e Evropës kundër zjarreve, sytë po kthehen nga qielli: jo vetëm duke kërkuar shi ose avionë Canadair që lëshojnë ujë, por edhe mënyra për të shfrytëzuar aftësitë e reja satelitore për të ndihmuar në përmbajtjen ose edhe parandalimin e zjarreve të reja.
Satelitët dhe imazhet e të dhënat që ata mbledhin nga hapësira po shihen gjithnjë e më shumë si një mjet për t’u ofruar qeverive evropiane dhe zjarrfikësve në terren informacion më të saktë: Për të hartëzuar dëmet dhe për të zbuluar zjarret në një fazë të hershme.
Një ndihmë e tillë është më se e mirëpritur gjatë një vere tjetër përvëluese evropiane me zjarre në Francë, Spanjë dhe Mbretërinë e Bashkuar. Përafërsisht 600,000 hektarë janë djegur në të gjitha vendet e BE-së që nga fillimi i vitit. Vetëm fundjavën e kaluar, Belgjika u godit nga një nga zjarret më të mëdha në historinë e saj, në rezervatin natyror High Fens.
Megjithatë, ky përdorim i fundit i satelitëve është një tjetër kujtesë se Evropa duhet të përmirësojë lojën e saj në një tjetër arenë strategjike, raporton “Politico”. Pasi Starlink i Elon Musk tregoi se si shërbimet me bazë satelitore mund të revolucionarizojnë gjithçka, nga komunikimi celular deri te kryerja e luftës, teknologjia hapësinore për menaxhimin e fatkeqësive ofron një rrugë të mundshme për Evropën për të konkurruar.
Greqia, një vend që duket se po përballet me zjarre më të mëdha çdo verë, ishte e para që veproi.
Në fillim të majit, një raketë e SpaceX e Musk transportoi katër satelitë të vegjël në hapësirë me detyrën specifike për të ndihmuar vendin të zbulonte dhe gjurmonte zjarret në kohë pothuajse reale. Ishte një hap vendimtar në ndërtimin e “Sistemit Helenik të Zjarrit”, për të cilin qeveria greke mburrej se ishte sistemi i parë kombëtar satelitor i këtij lloji.
Sistemi u krijua nëpërmjet një bashkëpunimi mbarëevropian, me ndihmën e Agjencisë Hapësinore Evropiane, homologut të saj grek, platformës gjermane të inteligjencës për zjarret në pyje Ororatech dhe ofruesit finlandez të satelitëve me bazë radari ICEYE.
“Duke integruar aftësitë e bazuara në hapësirë në sistemet tona të reagimit ndaj emergjencave, ne po i pajisim shërbimet tona të zjarrfikësve me mjetet që u nevojiten për të reaguar më shpejt”, tha Dimitrios Papastergiou, ministri i qeverisjes dixhitale dhe inteligjencës artificiale i Greqisë, në lançimin e saj në maj.
Satelitët që u lançuan para verës ishin të pajisur me dy aparate imazhesh infra të kuqe. Këta aparate kapin energjinë e nxehtësisë të rrezatuar nga zjarret, duke u lejuar satelitëve të zbulojnë pikat e nxehta dhe të matin intensitetin e tyre.
Sistemi është projektuar për të “mbështetur zbulimin e hershëm të pikave të nxehta në zhvillim dhe monitorimin e vazhdueshëm të sjelljes së zjarreve”, tha Agjencia Evropiane e Hapësirës.
Roli i satelitëve në mbledhjen e të dhënave dhe imazheve të shumta në kohë reale mund të ndihmojë edhe me ngjarje të tjera ekstreme të motit. Kompania finlandeze ICEYE ofron shërbime monitorimi për qeveritë dhe bizneset për të menaxhuar si katastrofat natyrore, siç janë përmbytjet dhe zjarret në pyje, ashtu edhe ato të shkaktuara nga njeriu, siç është shpyllëzimi i paligjshëm.
