Ministrja e Kulturës, Mirela Kumbaro në turin e inspektimit të monumenteve të kulturës, ka ndjekur nga afër restaurimet në disa shtëpi karakteristike të Gjirokastrës, të cilësuara shtëpi monumentale të kulturës.
Fondacion Trashëgimia Kulturore Pa Kufij (Cultural Heritage Without Borders CHwB) që punon në Gjirokastër me gjirokastritë dhe studentë ka zhvilluar një kamp restaurimi për të disatën herë në qytet. Këtë vit ata po kryejnë ndërhyrje specifike në 6 shtëpi monumente të kulturës .
Ministrja Kumbaro vizitoi shtëpinë e familjes Kore gjatë këtij kampi restaurimi ku morën pjesë studentë, të rinj dhe profesionistë nga Evropa dhe Shqipëria (përfshirë studentë të arkitekturës në Universitetin Luarasi dhe studentët nga dega e masterit për menaxhimin e trashëgimisë kulturore, në Fakultetin Filologjik dhe Historik, Universiteti i Tiranës).
Restaurimi ndërhyri për rinovimin e fasadës dhe çatisë.
Kampet Rajonale të Restaurimit, të vlerësuara me çmime prestigjioze nga Bashkimi Europian, u rikthyen në qytetin e çative të përhimta për edicionin e njëzetenjë, në datat 9-20 maj, 2015. 25 studentë dhe profesionistë të rinj nga Shqipëria dhe Ballkani Perëndimor u bashkuan në qytetin e gurtë për dy javë trajnim dhe punë intensive mbi konservimin dhe menaxhimin e monumenteve të trashëgimisë kulturore.
Paralelisht me këtë grup, një tjetër grup prej 17 profesionistesh ishin pjesë e kampit e Rogljevo-së (Serbi).
Kampet Rajonale të Restaurimit, të organizuar nga Trashëgimia Kulturore pa Kufij-Shqipëri (CHwB Albania) ofrojnë leksione dhe mundësi praktike mbi mënyrat e restaurimit dhe konservimit, duke përdorur materiale dhe teknika tradicionale.
Në Gjirokastër, pjesëmarrësit u ndanë në katër grupe, ku secili, nën drejtimin e kryemjeshtrave, u fokusua në punë të ndryshme restauruese: zdrukthëtari, muratori, suvatim dhe rilevim.
Monumentet historike të Kampeve Rajonale të Restaurimit përfshijnë:
Shtëpia Bakuli (Monument i Kategorisë II)
Shtëpia Xhelili (Monument i Kategorisë II)
Shtëpia Kore (Monument i Kategorisë I)
Shtëpitë e Mikpritjes
Përveç restaurimit të objekteve, Kampet Rajonale të Restaurimit gjithashtu punuan me pronarët e këtyre shtëpive-monumente që duan t’i përdorin ato si një shtëpi mikpritëse për turistët.
