Kandidati i Aleancës për Shqipërinë Europiane për bashkinë e Tiranës, Erjon Veliaj ka prezantuar pasditen e sotme programin e tij për kryeqytetin në njësinë numër 10.
Veliaj tha se kundërshtarët e tij politikë se nuk mund të jenë të aftë të rregullojnë Tiranën kur në 4 vjet nuk arritën dot të rregullojnë lagjet e tyre.
Kandidati i majtë për Tiranën premtoi zgjidhjen e problemeve të shumta të evidentuara në këtë njësi, që nga mungesa e rrugëve, trotuareve, apo kapakëve të pusetave, ndërsa tha se motoja e tij në krye të bashkisë do të jetë gjelbërimi, shtimi i parqeve dhe ambienteve publike që t’u shërbejnë të gjithëve.
“Do respektojmë moratoriumin e qeverisë për ndërtimet, nuk mund të vazhdojmë të ndërtojmë pallate kur janë me mijëra apartamente të pashitura”, tha Veliaj, duke shtuar se fushata e tij është ajo e problemeve të vogla, por jetike për komunitetin.
Veliaj ka premtuar ndërtimin e parkut të besimit, që do të rikthejë për publikun zonën e gjelbëruar prapa ish-hotel ‘Dajtit’ dhe përreth Piramidës.
