Shtëpia e Bardhë po konsideron disa plane që mund të çojnë sërish në ndarjen midis prindërve dhe fëmijëve në kufirin meksikan, duke shpresuar që të ndalojë numrin në rritje të familjeve që përpiqen të hyjnë ilegalisht në SHBA.
Një opsion që po shqyrtohet është që qeveria të arrestojë familjet që kërkojnë azil deri në 20 ditë, pastaj t’u japë prindërve një zgjedhje – të qëndrojnë në paraburgim familjar me fëmijën e tyre për muaj apo vite, apo të lejojë fëmijët të merren në një strehimore të qeverisë, kështu që të afërmit ose kujdestarë të tjerë të mund të kërkojnë kujdestari.
Ky opsion – i quajtur “zgjedhje dyanëshe” është një nga disa planet që po shqyrton presidenti lidhur me sigurinë e kufirit. Trump nuk ka qenë në gjëndje të përmbushë premtimin kryesor për të ndërtuar një mur në kufi dhe për t’i dhënë fund asaj që ai e quan proçesi “kap e liro”, një proces që filloi me administratat e kaluara, në të cilat familjet e burgosura janë liruar shpejt për të pritur seancat dëgjimore të emigracionit.
Numri i anëtarëve të familjeve migrante të arrestuara dhe të akuzuara për kalimin e paligjshëm të kufirit kaloi 38% për qind në gusht dhe tani është në një nivel rekord, sipas zyrtarëve të Departamentit të Sigurisë Kombëtare, shkruan Washington Post.
Më shumë se 90,000 të rritur me fëmijë u kapën në kufirin jugperëndimor në 11 muajt e parë të vitit 2018. Shifra më e lartë u shënua në vitin 2016, kur kaluan kufirin 77 600 emigrantë.
a.ç
