Nga Spartak Ngjela
Historia e padrejtë i detyron popujt të dyshojnë se mund të vijë ndonjëherë e drejta dhe mirëqenia për ta. Edhe shqiptarët, prandaj kanë të drejte të pyesin, se janë zhgënjyer historikisht. Por këtë herë ne do të dalim përfundimisht nga trishtimi ynë shekullor i padrejtësisë. Vendosja e drejtësisë do të jetë vetëm fillimi…
Gjithçka në politikën shqiptare duket sot si e hutuar, kurse amerikanët filluan të krijojnë buxhetin e Reformës shqiptare. Ata si gjithmonë: të kthjellët. Gjë shumë serioze kjo, sepse Reforma është një shpenzim i madh: kostoja e saj do shkojë deri në 150 milionë dollarë në vit. Por, fakti që amerikanët filluan ta miratojnë fondin, tregon se janë të sigurt në votimin gjatë muajit gusht. Prandaj, “ekspertët” e Saliut po lodhen kot nëpër vapë.
Shqipëria, në gjendjen siç është, nuk e shlyen dot shpenzimin e madh të Reformës në Drejtësi. Por fati shqiptar i Reformës është mbështetja amerikano-gjermane, është mbështetja që të korruptuarit e quajnë “cenim të sovranitetit”. Sigurisht që pasuria e tyre e paligjshme do të cenohet.
Vetingu është vetëm fillimi.
Bashkë me Reformën në Drejtësi, patjetër që duhet të fillojë Reforma për Pronën në Shqipëri. Grabitja e pronës nga korrupsioni shtetëror dhe krimi i organizuar, ka bllokuar dhe denatyruar tregun shqiptar. Reforma për pronën kërkon një legjislacion perfekt të nivelit të lartë, dhe një institut profesional me shqiptarë dhe të huaj, që duhet të ngrihet në Tiranë. Ekspertët e Bashkimit Europian që do angazhohen pas çeljes se negociatave me BE, këtë aspekt duhet ta kenë në qendër të vëmendjes. Shpenzimi për risistemimin juridik të pronës në Shqipëri është shumë i madh. Por ai do të sigurohet.
Korrupsioni asgjësohet si krim deri në muajin tetor – nëntor të këtij viti, por shqiptarët përsëri me të drejtë pyesin: “Çfarë do të bëhet me ne?” Në fakt këtu fillon filozofia e re.
Gëzimi i ndëshkimit largohet menjëherë posa mendohen hallet e punësimit dhe mirëqenies shqiptare, të cilat tani i ka groposur korrupsioni shtetëror dhe krimi i organizuar. E gjithë çoroditja në prodhimin shqiptar, në krijimin e një tregu real dhe, sidomos, në çeshtjen e bujqësisë dhe të turizmit, ka qenë vepër koshiente e korrupsionit.
Vjedhja e madhe që iu është bërë shqiptarëve, ka qenë krim i organizuar kundër mirëqenies së tyre. Nuk ka mirëqenie shoqërore në një kapitalizëm pa ligje. Drejtësia është epiqendra e sistemit të sotëm politik, dhe mungesa e saj ka sjellë shkatërrim kombëtar në vlerat tona ekonomike. Ka rrënuar pyjet dhe vaditjen; ka degraduar qytetet dhe sistemimin e turizmit, dhe në fund ka degraduar arsimin për të rilindur injorancën në Shqipëri.
Injoranca ka pushtuar vetë sistemin.
Gjendja është e rëndë dhe kritike. Por le të vendoset një herë drejtësia, si pikë fillestare e nisjes sonë, se të tjerat vijnë me radhë. Dhe, ky muaj, është fillimi i modernitetit shqiptar. Bashkë me gushtin, ikën dhe vapa – themi ne shqiptaret – prandaj na duhet të themi se, bashkë me gushtin, ikën vapa dhe korrupsioni shtetëror në Shqipëri. Por më pas shqiptarët patjetër që do të pyesin: “Çfarë do të bëhet me zhvillimin, ekonominë dhe mirëqenien shqiptare”.
Për këtë realisht duhet menduar dhe duhet folur menjëherë pasi të jetë vendosur drejtësia në Shqipëri.
