Deputeti i Partisë Demokratike dhe Sekretar për Çështjet Ligjore, Ivi Kaso, ka deklaruar se Reforma Administrative dhe Territoriale e vitit 2014 ka dështuar në përmbushjen e objektivave të saj, duke sjellë vetëm efekte zgjedhore dhe jo përmirësim të shërbimeve për qytetarët.
Gjatë një interviste në emisionin “Tema e Ditës” me gazetarin Arbër Hitaj në RTSH, Kaso bëri publik propozimin e opozitës për një ndarje të re territoriale, e cila parashikon krijimin e 98 njësive të qeverisjes vendore.
“Ne jemi të mendimit që ato që paralajmëruam në 2014 tashmë kanë ndodhur. Reforma u bë vetëm për qëllime zgjedhore dhe elektoral, dhe dha vetëm efekt elektoral. Asnjë nga objektivat e saj nuk u realizua. Ndaj themi që ta kthejmë reformën atje ku u nis, duke pasur ato qëllime.Ne jemi për një projekt që e kemi çuar prej tre vitesh, të konsultuar me ekspertë vendas dhe të huaj, dhe që parashikon ndarjen e Shqipërisë me 98 njësi të qeverisjes vendore,” u shpreh Kaso.
Në vijim të intervistës, Kaso komentoi edhe diskutimet për zgjatjen e mandatit të prokurorëve të SPAK, duke sqaruar se kjo çështje është trajtuar që në momentin e miratimit të ligjit për SPAK dhe ndryshimet kushtetuese përkatëse.
Ai theksoi se mandati 9-vjeçar i prokurorëve të posaçëm është në përputhje me modelet ndërkombëtare dhe nuk parashikon të drejtën e ripërsëritjes.
“Mandatet e gjata, si ai 7-vjeçar i Prokurorit të Përgjithshëm apo ai 9-vjeçar i Prokurorëve të Posaçëm, janë mandate pa të drejtë ripërsëritjeje, sipas praktikave më të mira europiane dhe botërore,” tha Kaso.
Ai shtoi se prokurorët e SPAK, pas përfundimit të mandatit, nuk dalin jashtë sistemit, por kalojnë në Prokurorinë e Apelit, duke ruajtur statusin profesional, përfitimet financiare dhe sigurinë e shtuar që u është garantuar pas ngjarjeve të fundit.
“Personalisht nuk jam sot për zgjatjen e mandatit, por kjo nuk është një çështje që shqetëson sistemin apo Kuvendin e Shqipërisë, sepse nuk ka një iniciativë të tillë. Por kur të vijë koha, duhet të ulemi dhe të diskutojmë mbi modelet më të mira që sugjerojnë ekspertët ndërkombëtarë,” përfundoi ai.
Duke folur për procesin e zgjedhjes së Avokatit të Popullit, Kaso theksoi se opozita nuk ka qenë pengesë në asnjë fazë të këtij procesi, i cili ka zgjatur për gati tre vite pas përfundimit të mandatit të drejtuesit aktual të institucionit.
“Opozita nuk ka qenë asnjëherë bllokuese në këtë proces. As në këtë proces që ka zgjatur pothuajse tre vite. Nga opozita nuk ka munguar as kandidatura e propozuar apo e mbështetur prej saj,” tha Kaso.
Ai kërkoi që raundi aktual i votimit të përmbyllet dhe që opozita të ketë mundësinë të mbështesë kandidaturat e saj, në përputhje me traditën parlamentare.
“Avokati i Popullit nuk është një pozicion që i jep opozitës pushtet të pamerituar, por është brenda rolit dhe misionit të saj. Nuk është thjesht çështje emri, por edhe çështje procesi,” përfundoi Kaso.
