Ministria e Bujqësisë ka njoftuar për praninë e sëmundjes ‘’dermatoza nodulare e gjedhit”, e cila pasi ka prekur disa vende të rajonit rrezikon edhe Shqipërinë, por thekson se nuk paraqet rrezik për njerëzit.
Ministria ka marrë masa për bllokimin e importit të kafshëve të gjalla dhe mishit i cili e ka origjinën nga vendet e prekura nga kjo sëmundje.
Sëmundja ‘’dermatoza nodulare e gjedhit” ka prekur disa shtete të rajonit si: Turqi, Maqedoni, Kosovë, Serbi, Bullgari Greqi, e pikërisht nga këto vendit do të ndalohet importi.
Me urdhër të posaçëm të ministrit të Bujqësisë, Edmond Panariti, është ngritur një Task Forcë, e përbërë nga veterinerë dhe epidemologë për informimin, parandalimin dhe monitorimin e përhapjes së kësaj sëmundje.
“Ministria e Bujqësisë i bën thirrje fermerëve të sinjalizojnë menjëherë çdo dyshim për prezencën e kësaj sëmundje pranë Drejtorive të Bujqësisë në të gjithë vendin, ose pranë Shërbimit Veterinar, në Ministrinë e Bujqësisë.
Ministria e Bujqësisë i ka kërkuar Këshillit të Ministrave, miratimin e një fondi emergjence për blerjen e vaksinës kundër kësaj sëmundje dhe mbetet në pritje të alokimit të këtij fondi”, theksohet në një njoftim zyrtar të ministrisë. (b.an)
