Teksa procesi i numërimit po shkon drejt fundit dhe fitorja e PS-së po konsolidohet, ka ardhur edhe reagimi i parë nga Bashkimi Evropian për procesin. Zgjedhjet në Shqipëri vlerësohen të qeta dhe të rregullta ndërsa theksohet se u respektuan liritë themelore.
Përmes një deklarate për mediat, përfaqësuesit e lartë Frederica Mogherini dhe komisionari Johannes Hahn shprehen se zgjedhjet ishin të rregullta. Ata dhanë sinjale se tashmë Shqipëria do të mbështetet për reformat.
“Procesi zgjedhor ishte paqësor dhe i rregullt. U respektuan liritë themelore. “Pasi të përfundojë procesi zgjedhor, do të angazhohemi me qeverinë e re për të mbështetur procesin e reformave dhe për të vazhduar procesin e integrimit në BE. Vazhdimi i reformës së drejtësisë dhe lufta kundër trafikut të drogës dhe kultivimit do të jetë e një rëndësie të veçantë në këtë drejtim” thuhet ndër të tjera në deklaratën e Mogherinit dhe Hahn.
Deklarata e plotë
Zgjedhjet parlamentare të Shqipërisë më 25 qershor u zhvilluan në mënyrë të qetë dhe të rregullt.
Qytetarët patën alternativa të gjera politike në një fazë të rëndësishme të procesit të integrimit të Shqipërisë në BE.
Sipas konkluzioneve paraprake të Misionit të Vëzhgimit të Zgjedhjeve të OSBE/ODIHR, kandidatët kishin mundësi të bënin lirshëm fushatë dhe liritë themelore të grumbullimit dhe shprehjes u respektuan.
Korniza zgjedhore në përgjithësi siguroi një bazë të përshtatshme për zhvillimin e zgjedhjeve demokratike.
Kemi marrë parasysh rezervat e shprehura nga vëzhguesit lidhur me politizimin e organeve zgjedhore në kundërshtim të ligjit.
Ne presim adresimin e duhur të gjetjeve paraprake të Misionit të Vëzhgimit të Zgjedhjeve, sidomos lidhur me akuzat për blerjen e votave dhe presionin ndaj votuesve, si dhe ndërhyrjen e aktivistëve të paautorizuar të partive, të cilët mund të dëmtojnë besimin e publikut në zgjedhje.
Pasi të përfundojë procesi zgjedhor, do të angazhohemi me qeverinë e re për të mbështetur procesin e reformave dhe për të vazhduar procesin e integrimit në BE.
Vazhdimi i reformës së drejtësisë dhe lufta kundër kultivimit dhe trafikut të drogës do të jetë e një rëndësie të veçantë.
Ne gjithashtu presim të vazhdojmë partneritetin tonë me Shqipërinë për të nxitur bashkëpunimin rajonal dhe marrëdhëniet e fqinjësisë së mirë.
Më herët edhe ambasada e SHBA vlerësoi procesin./a.m.
