Drejtoresha e Përgjithshme e Doganave të Shqipërisë, Pranvera Fagu zhvilloi një vizitë pune në Podgoricë, ku u takua me homologun malazez, Vladan Jokoviç. Fillimisht, Fagu dhe Jokoviç rikonfirmuan vullnetin për të çuar më tej bashkëpunimin në të gjitha nivelet dhe fushat me interes të përbashkët, por fokus kryesor në këtë takim ishte bashkëpunimi në fushën operativo-hetimore.
Në këtë kuadër, u ra dakord që të intensifikohen bashkëpunimi veçanërisht në fushën e inteligjencës dhe realizimin e operacioneve të përbashkëta të anti-kontrabandës.
Gjithashtu, duke vlerësuar rëndësinë e kontrollit të tregtisë së mallrave të akcizës, të dy drejtuesit e Administratave Doganore ranë dakord që të vijojë bashkëpunimi në këtë fushë.
Në takim u diskutua edhe lidhur me investimet në përmirësimin e infrastrukturës në Pikat Kalimit Kufitar të Bozhajand – Hani i Hotit dhe Sukobin –Murriqan.
Fagu e siguroi homologun malazez se nga pala shqiptare do të ndërmerren të gjitha veprimet e nevojshme që Pika e Kalimit Kufitar Hani i Hotit të jetë funksionale 24 orë, në 7 ditë të javës, me qëllim lëvizjen më të shpejtë të mallrave, referon Koha. (b.an)
