Breshëri plumbash mbi zyrën elektorale të Partisë Socialiste në Sukth të Durrësit. Persona ende të paidentifikuar kanë qëlluar mbi ambientet e saj mbi 15 plumba blindëshpues. Zyra që shërbente për stafin e Partisë Socialiste të zonës ndodhej në një lokal, në pronësi të Rrapo Osmanit, koordinator i PS-së për këtë zonë.
Burime nga Policia e Durrësit thanë se, pas marrjes së informacionit, kanë shkuar në vendin e ngjarjes, duke marrë në pyetje pronarin dhe duke shoqëruar disa persona të dyshuar për sulmin me armë ose dëshmitarë të saj.
Sulmi me kallashnikov me plumba blindëshpues mësohet se është bërë në orën 01:00 të mëngjesit të datës 2 qershor.
Rrapo Osmani, 42 vjeç, baba i 4 fëmijëve, e përjashton plotësisht dyshimin se bëhet fjalë për një ngjarje për konflikte personale. Ai e lidh këtë ngjarje me detyrën e re që pritet të marrë, si administrator i zonës së Sukthit, i votuar nga Asambleja e Partisë Socialiste.
“Ky ambient ka shërbyer si zyrë elektorale edhe në kohën e PD-së. Nuk kemi pasur sulme dhe nuk kam pasur asnjë presion prej tyre.
Fatmirësisht nuk kam as konkurrencë brenda partisë. T’i lëmë kohë policisë të vërë para përgjegjësisë autorët e të zbardhë ngjarjen”, tha Osmani, në një prononcim për mediat raporton Panorama.
Policia ka numëruar shenjat e lëna nga plumbat, pasi autorët mësohet se pas sulmit kanë mbledhur nga vendngjarja gëzhojat e kallashnikovit, që këtë radhë dyshohet se ka qenë blindëshpues./a.m.
