Fruthi ka shpërthyer edhe në Shqipëri muajt e fundit, ku ISHP konfirmoi 12 raste të fëmijëve të prekur nga kjo sëmundje infektive në periudhën janar-mars.
Për të folur lidhur me situatën nga fruthi në vendin tonë, e ftuar ditën e sotme në emision ‘Sot Live në Shqipëri’ në Report Tv me gazetarin Nertil Agalliu ishte drejtoresha e ISHP, Eugena Tomini.
Tomini tha se rastet e prekura janë ato që nuk kanë kryer në kohë vaksinimin.
‘Gjatë vitit 2024 kemi pasur shpërthime të fruthit, por ka pasur raste të shkëputura dhe që nuk kanë qenë të lidhura epidemiologjikisht me njëri-tjetrin, dhe janë raste që nuk kanë kryer vaksinimin në kohë. Ka prindër që për arsye të neglizhimit nuk e kanë dërguar fëmijën që të kryejë vaksinimin në moshën 12- vjeç, por e kanë kryer në moshën 15 ose 18. Ky fakt rëndon në shëndetin e fëmijëve dhe jo vetëm të fëmijës dhe të një individi, por edhe të komunitetit. Duhet që të kishte një ndërgjegjësim që në periudhën që kishim dy shpërthime vitin që shkojë’, tha ajo.
Teksa u pyet lidhur me qytet, ku janë konfirmuar rastet me fruth, Tomini tha se dy raste janë në Tiranë.
‘Rastet janë në Tiranë, kemi pasur dy raste para disa javësh. Kjo histori e shfaqjes së rasteve me fruth ka filluar që nga viti 2017, para Covid ne kemi pasur një mbulesë vaksinale shumë të lartë. Në mbarë botën është kjo politika për rritjen e mbulesës vaksinale’, tha ajo.
Tomini tha se prindërit nuk duhet që të frikësohen nga vaksinimi i fëmijëve të tyre. Ajo theksoi se ata duhet që të marrin informacione tek pediatri dhe mjeku i familjes.
‘Prindërit duhet që të marrin informacionin në burime të sigurta informacioni, të konsultohen me mjekun pediatër që ndjek fëmijën e tyre, po ashtu edhe me mjekun e familjes. Ka prindër që duan që ta shtyjnë disa muaj vaksinimin sepse thotë edhe pak sa të ecë vet dhe pak dhe të rritet. Por vaksinimi bëhet në atë kohë që është e rekomanduar’, tha ajo.
Teksa u ndal tek mosha për rastet që janë prekur nga fruthi, ajo tha se janë nga 1 deri në 5 vjeç.
‘Është mosha nga 1 deri në 5 vjeç dhe janë raste kur nuk është bërë vaksinimi i plotë. Doza fillestare nuk jep imunitetin e plotë dhe nuk kryejnë aplikimin e dozës së parë në kohën e duhur. Por, pse duhet që të provojë sëmundjen e fruthit një moshë që është nën 5- vjeç vetëm se pse nuk ka kryer vaksinimin në kohën e duhur’, tha ajo.
