“HackDay Albania 2016”, eventi që organizohet për vitin e dytë radhazi nga ALCIRT nën kujdesin e Ministres së Shtetit për Inovacionin dhe Administratën Publike, Milena Harito është finalizuar me dhënien e çmimeve për më të talentuarit e teknologjisë së Informacionit.
Ky aktivitet që ka mbledhur nxënës dhe studentë jo vetëm nga Shqipëria, por edhe nga Kosova, kishte në fokus zbulimin e talenteve të reja në fushën e sigurisë kibernetike. Këta janë studentë të teknologjisë së Informacionit, të apasionuar pas sigurisë kibernetike.
Në maratonën e këtij viti, morën pjesë 25 pjesëmarrës, të cilët për 10 orë me radhë kanë tentuar të thyejnë sigurinë e një aplikacioni test të përgatitur posaçërisht nga ALCIRT. Pjesa më e madhe e të rinjve pjesëmarrës arriti të identifikonte pikat e dobëta të aplikacionit. Gjetjet e dobësive u paraqitën në një raport, i cili ju dorëzua jurisë për vlerësim.
Në ceremoninë e dhënies së çmimeve, ministrja e Shtetit për Inovacionin dhe Administratën Publike, Milena Harito ka theksuar rëndësinë e sigurisë kibernetike në ditët e sotme. “Jemi duke jetuar në kohën e Revolucionit IV industrial, atij që njihet si Revolucioni dixhital. Siguria kibernetike është jo vetëm çështje e shtetit por edhe e sektorit privat, kompanive të telekomunikacionit, sektorit bankar etj”, tha ajo.
Ministrja theksoi se pak ditë më parë Këshilli i Ministrave ka aprovuar një ligj të veçantë për sigurinë kibernetike: “Është hera e parë që mitratohet një ligj i tillë dhe kështu ne po krijojmë kuadrin e nevojshëm që siguria kibernetike të forcohet jo vetëm për shtetin, por për të gjithë shoqërinë, për gjithë sektorin privat, për të gjithë aktivitetin dixhital”.
Drejtoresha e ALCIRT, znj.Rovena Bahiti në fjalën e saj ka falenderuar bashkëpunetorët në realizimin e “HackDay Albania 2016”, kompanitë “IkubInfo”, “Albtelecom”, “Vodafone” dhe “Dyqan Taxi”.
Ceremonia vijoi me ndarjen e çmimeve:
Çmimi i Parë – Erlind Cekaj
Trajnim dhe Certifikim Penetration Test ofruar nga “IkubInfo”
Çmimi i dytë – Florian Kunushevci dhe Shkumbin Shala
Abonim 12 mujor interneti nga “Albtelecom” dhe Program Student Membership ofruar nga “Vodafone”.
Çmimi i tretë – Andi Rrahmani
Smart Watch nga “Dyqan Taxi”.
