Koronavirusi tashmë është bërë pjesë e përditshmërisë edhe në Zvicër. Atmosfera që sjell kjo sëmundje me vete, së fundi është bartur edhe në Parlamentin zviceran.
Kështu, që në fillimin e seancës së djeshme parlamentare, koronavirusi u bë shkaktar i një mosmarrëveshjeje në sallë: Kryetarja e Dhomës Nacionale të Parlamentit, Isabelle Moret ka ndaluar deputeten nga SVP Magdalena Martullo-Blocher të vendosë një maskë mbrojtëse në sallën e Parlamentit.
“Ajo më tha se duhej ta hiqja maskën”, ka deklaruar Martullo-Blocher për Keystone-SDA. Deputetja e qortuar më pas është larguar nga salla. Martullo-Blocher tha se ajo ende nuk kishte vendosur nëse do të kthehej në sallë pa maskë apo do të qëndronte larg debatit, shkruan albinfo.ch.
Deputetja thotë se nuk dëshironte të infektonte askënd. Sipas saj, disa anëtarë të këshillit ishin në rrezik. Përveç kësaj, ekziston një rrezik i rritur i infeksionit në parlament, pasi aty ulen shumë njerëz së bashku për një kohë të gjatë dhe afër njëri-tjetrit. Ajo thotë se vendimi nuk ishte i drejtë. Kjo gjë gjithashtu ka të bëjë me lirinë personale, ka thënë deputetja.
