Policia e Tiranës thotë se ka parandaluar një ngjarje të rëndë kriminale për motive pronësie, në zonën e Ndroqit, me pasojë një të plagosur.
Pas informimit lidhur me ngjarjen, u bë arrestimi i dy personave dhe u bllokua një armë gjahu me fishejkë.
Efektivët e komisariatit nr.6 në Tiranë, vunë në pranga D. N., 45 vjeç dhe K. D., 27 vjeç, banues në fshatin Shesh, Ndroq.
Arrestimi i tyre u bë pasi, në fshatin Shesh, Ndroq, shtetasi D. N., për motive pronësie ka goditur me kazmë shtetasin E. D, i cili ndodhet në spital jashtë rrezikut për jetën.
Konflikti mes tyre ka agravuar më tej nga djali i të plagosurit, i cili ka marrë një armë gjahu të mbushur me fishekë, të cilën e posedonte me leje dhe ka tentuar të qëllojë shtetasin D. N., në banesën e tij, por nuk mundi dot në sajë të ndërhyrjes së policisë.
Gjithashtu, falë veprimeve të shpejta është bërë i mundur edhe bllokimi i armës së gjahut me fishekë, me të cilën i riu dyshohet se do kryente krimin.
Lidhur me këtë ngjarje hetimet janë në vijim, ndërkohë që materialet iu referuan Prokurorisë së Tiranës, për veprat penale “Plagosja e rëndë me dashje”, në ngarkim të D. N dhe “Vrasje e mbetur në tentativë”, në ngarkim të shtetasit K. D.
/a.r
