Një vatër zjarri ka shpërthyer gjatë orëve të mbrëmjes në fshatin Kotë të bashkisë Selenicë, duke përfshirë sipërfaqe të tëra me shkurre e ullishte në kodrën që rrethon zonën. Për shkak të erës dhe terrenit të thyer, flakët janë përhapur me shpejtësi drejt zonës së banuar, duke rrezikuar drejtpërdrejt disa shtëpi të fshatit.
Situata Paraqitet kritike në terren, ndërsa kapacitetet e Bashkisë Selenicë për përballimin e emergjencave janë tejet të kufizuara. Me vetëm një mjete zjarrfikës në dispozicion, autoritetet vendore i kanë bërë thirrje urgjente për ndihmë bashkive fqinjë dhe Agjencisë Kombëtare të Mbrojtjes Civile.
Ndërhyrja nga Himara dhe mobilizimi i banorëve
Për t’i ardhur në ndihmë Selenicës, nga Bashkia e Himarës janë nisur menjëherë mjete zjarrfikëse dhe ekipe operacionale drejt fshatit Kotë. Në terren po punojnë edhe vetë banorët e zonës me mjete rrethanore, në përpjekje për të krijuar prita mbrojtëse rreth shtëpive më të ekspozuara nga tymi dhe flakët.
