Një prej punonjësve të burgut të Shënkollit, që u shkarkua nga detyra pas zjarrit që i kushtoi jetën një të dënuari, pretendon se është larguar pa të drejtë, pasi ai nuk ndodhej në punë në momentin e ngjarjes.
Në fakt ka qenë vajza e punonjësit, e cila përmes një mesazhi të dërguar në “BalkanWeb”, bën të ditur se babai i saj ishte me leje kur ndodhi zjarri dhe nuk e kupton arsyen e largimit nga detyra. Sipas saj, ndaj punonjësve që ishin në detyrë atë ditë, nuk është marrë asnjë masë.
“Përshëndetje unë që po ju shkruaj jam vajza e njërit prej punonjësve që deri para dy ditësh shërbente në institucionin e vuajtjes së dënimit në Shenkoll. Po ju shkruaj për padrejtësinë që po i shkaktohet babait tim. Të premten dhe të shtunën ai person ishte me leje pranë familjes së tij, ndodh ngjarja dhe ai përsëri nuk ishte në detyrë, kur merren masat administrative nga Drejtoria e Përgjithshme e Burgjeve për të parin që merr masë largimi është emri i babait tim. Ndërsa për personat që ishin në detyrë atë dite dhe që kishin për detyrë të përcaktuar nga rregullorja për të parandaluar ngjarjen nuk merret asnjë masë, ata vazhdojnë punën të qete pa u shqetësuar fare. I kërkoj Ministrit të Drejtësisë, po ashtu dhe DPB ti rishikojë më mirë masat dhe përgjegjësia të ndahet ne proporcionalitet me fajin që ka gjithsecili punonjës në atë institucion mos të bie përgjegjësia vetëm në një person, që deri dje i shërbente brenda rregulloreve të përcaktuar nga DPB, madje duke punu shumë ditë larg familjes se tij. Ju lutem ju ai staf ta beni publike këtë rast për padrejtësinë që u bëhet punonjësve të këtyre institucioneve që nuk kanë asnjë lloj mbështetje edhe pse këta persona kane vite eksperience pune e flaken si qen në rrugë të madhe”, shkruan Ersi Deda, vajza e punonjësit të shkarkuar.
Pas ngjarjes së të shtunës në burgun e Shënkollit, ku një i dënuar humbi jetën dhe 7 të tjerë u asfiksuan, Drejtoria e Përgjithshme e Burgjeve ka marrë masat disiplinore për punonjësit e këtij burgu. Drejtoria e Burgjeve bëri të ditur se janë firmosur 11 largime nga detyra, 10 policë dhe 1 civil. Kanë marrë paralajmërim për shkarkim 19 persona, mes tyre 17 policë e 2 civilë. Gjithashtu, vërejtje me shkarkim ka marrë edhe drejtori i burgut, Gjergj Prendi, ndërsa shefit të policisë, Ferdinand Preçi iu firmos transferimi.
BW/d.i.
