Shënim / Një lajm i mirë që vjen nga qelitë e burgjeve

Nga Lorenc Vangjeli / Të burgosurit nuk do të përdoren në fushatë

Nëse konsultohen ankesat e partive të opozitës duke nisur të paktën që nga vitet 2000 e këtej, në çdo pragfushatë dhe fushatë elektorale, një element nga lista e gjatë e ankesave  nuk ka munguar kurrë. Ka qenë madje nga më kryesoret dhe më të prekshmet. Edhe nga më të rrezikshmet, natyrisht.

Ankesa që përfundonte më pas si një e vërtetë në çdo raport të OSBE/ODIHR-it më pas, ishte se partia/partitë qeverisëse përdornin në fushatë edhe një kontigjent të vështirë: të burgosur dhe familjarë të tyre. Që së bashku bëjnë një nga ato segmente të shoqërisë shqiptare që duket se përballë të tashmes individuale, nuk kanë çfarë humbin më shumë në të ardhmen.

Dhe që janë të gatshme të bëjnë gjithçka për një premtim për liri të përkohshme, për një ulje të mundshme të dënimit apo qoftë dhe një trajtim më të mirë në burg, transferim nga një burg në tjetrin dhe gjëra të këtij lloji.

Eshtë njerëzore dhe gati-gati e paqortueshme që oferta e kësaj kategories sociale, të burgosur dhe familjarë të tyre, të jetë shumë e përputhshme me  kërkesa në kufi dhe përtej kufirit të ligjit gjatë fushatave elektorale. Në favor të partisë/partive që qeverisin dhe kundër partive që kërkojnë të zëvendësojnë qeverisjen. Kësaj rradhe, në fushatën e lokaleve të këtij qershori, gjërat duket se kanë ndryshuar. Njëlloj siç ka ndryshuar vetë shoqëria shqiptare e cila, nën qeverisjen e të majtëve, në mos është bërë më e mirë, sigurisht që është bërë më e emancipuar. Qoftë dhe vetëm në formë sikur të ketë ndodhur kjo, do të ishte një lajm i mirë. Ministri i Drejtësisë Nasip Naço njoftoi sot pikërisht këtë gjë: pezullimin e të gjitha lejeve shpërbluyese për periudhën e fushatës, me përjashtim të rasteve urgjente.

Një kufi i ri politik i vullnetit për të pasur vullnet që në zgjedhje të mos ketë ndikime nga qelitë e ngushta të burgjeve në dhomën e vogël të fshehtë të votës.

Ky është vetëm një detaj sepse duhen shumë detaje për të verifikuar vullnetin e shumicës së majtë për një standart të ri në zgjedhje. Sepse në thelb, gara e saj e vërtetë është pikërisht kjo: të fitojë standartet përpara emrave të kryetarëve të bashkive që duket se i ka paramarrë.