EKSKLUZIVE/ Kanë ngjallur jo pak polemika brenda opozitës, deklarata e kryetarit të PD-së Lulzim Basha, se do të bojkotojë zgjedhjet nëse kryeministër, deri në zgjedhjet e ardhshme parlamentare, do të jetë Edi Rama. Këto deklarata të tij janë vlerësuar gjerësisht në kampin opozitar si “tejet të nxituara” dhe në thelb si “kapitulluese”. Një prej figurave qëndrore të opozitës, Dashamir Shehi, në një prononcim për Javanews, vlerëson se deklarata të këtij karakteri janë shumë të nxituara dhe aspak të dobishme në këto momente.
Sipas tij, deri në zgjedhjet e ardhshme parlamentare ka ende kohë që opozita të organizohet dhe t’i fitojë zgjedhjet. “Nuk kemi pse paragjykojmë kur zgjedhjet janë ende larg. Detyra jonë është të motivojmë dhe jo të demotivojmë elektoratin. Deklarata të tilla janë shumë të shkujdesura dhe të nxituara. Opozita ka të gjitha shanset reale që t’i fitojë zgjedhjet. Ndaj del si detyrë të motivojmë elektoratin. Rregullat e lojës janë rregulla loje në një sistem demokratik. Ato meritojnë të zbatohen nga të gjitha palët. Bojkoti nuk është rruga e duhur. Politika e bojkotit është një politikë e dështuar”, shprehet Shehi.
Sipas tij, në këto momente është e rëndësishme që të bëhen ndryshimet e duhura ligjore në ligjin për zgjedhjet. Shehi vlerëson se “politika duhet të ndryshojë rregullat që zgjedhjet të jenë brenda standarteve dhe jo njerëzit”. “Të kapesh pas emrave duke anashkaluar ndryshimet ligjore në reformën për zgjedhjet, është si të luftosh me “mullijtë e erës”. Opozita ka nevojë për rregulla të qarta e standarte zgjedhore, të cilat duhen respektuar nga të gjitha palët”, shprehet Shehi.
“Bojkoti” si telenovelë
Ndërsa kryedemokristiani, Nard Ndoka, vlerëson se deklarimet një vit e gjysëm përpara zgjedhjeve për bojkot, shprehin më shumë një krizë personale të kreut të PD-së Basha dhe gjendje paniku të tij.
Sipas tij, nuk mund t’i caktosh forcës politike kundërshtare se kush duhet të jetë kryetari apo kryeministri. “Marrim për një moment që dhe Rama thotë se s’dua të hyjë në zgjedhje me Lulëzim Bashën kryetar të PD-së. Çfarë ndodh? Në fakt asgjë. Zgjedhjet do të bëhen do apo nuk do Rama që Basha të jetë kreu i PD-së, apo do apo s’do Basha që Rama të jetë kryetar i PS-së dhe kryeministër. Deklarata e Bashës më shumë më duket si një deklaratë kapitulluese e opozitës. Vendimet për të bojkotuar zgjedhjet nuk janë të lehta për tu marrë. Më habit fakti që Basha i artikulon me aq qetësi”, shprehet Ndoka.
Sipas kreut të PDK, deklaratat për bojkot të zgjedhjeve nga ana e Bashës janë bërë tashmë si telenovelë, sepse edhe në prag të zgjedhjeve vendore deklaroi bojkotin, më pas u detyrua të hyjë në zgjedhje duke shënuar një rezultat negativ për PD-në. Sipas tij, reforma zgjedhore është pika ku palët duhet të përqëndrohen për të rritur transparencën, standartet dhe një votim të lirë dhe të ndershëm.
(javanews.al) Me. Ar
