Ministri grek i Fiancave, Janis Varufaqis akuzoi sot kreditorët e vendit për terrorizëm dhe se po kërkojnë të ”fyejnë grekët”, të cilët do të shprehen gjatë referendumit që do të zhvillohet nesër për propozimet e tyre të fundit të reformave.
“Ajo që kanë bërë me grekët ka një emër ”terrorizëm”, akuzoi Janis Varufaqis, i njohur për lirshmërinë e tij, në një intervistë për të përditshmen spanjolle ”El Mundo”.
“Përse na detyruan të mbyllim bankat? Për të rritur frikën tek njerëzit. Dhe kur bëhet fjalë për përhapje të frikës ky fenomen quhet terrorizëm”, theksoi Ministri duke folur për politikën e ndërmarrë nga kreditorët e Athinës, Fondi Monetar Ndërkombëtar (FMN), Banka Qendrore Evropiane (BQE) dhe Bashkimi Evropian.
Në mungesë të arritjes së një marrëveshjeje me kreditorët për një zgjatje të programit të ndihmës financiare pas 30 qershorit, qeveria e majtë radikale greke njoftoi mbylljen e bankave dhe kontrollin e kapitaleve deri më 6 korrik.
“Kushdo qoftë rezultati i referendumit, të hënën do të ketë një marrëveshje, jam shumë i bindur për këtë. Evropa ka nevojë për një marrëveshje, Greqia ka nevojë për një marrëveshje, për këtë shkak ne do të arrijmë një marrëveshje”, nënvizoi Varufaqis.
