Një gjykatë në Belgjikë ka vendosur të zgjasë me një muaj paraburgimin e një shtetaseje kanadeze me origjinë kineze, e cila dyshohet për spiunazh gjatë periudhës kur punonte si praktikante në selinë ushtarake të NATO-s në Mons.
Prokuroria Federale e Belgjikës bëri të ditur se Dhoma e Akuzave vendosi për zgjatjen e masës së paraburgimit pasi shqyrtoi ankesën e të dyshuarës ndaj një vendimi të mëparshëm për mbajtjen e saj në paraburgim.
Sipas autoriteteve, gruaja po mbahet në kuadër të një hetimi federal lidhur me dyshime për veprimtari spiunazhi.
Në korrik, mediat belge raportuan se shtetasja kanadeze ishte arrestuar pasi kishte tërhequr vëmendjen e shërbimeve të sigurisë në Shtabin Suprem të Fuqive Aleate në Evropë (SHAPE), që ndodhet në Mons dhe shërben si seli ushtarake e NATO-s.
Prokuroria Federale deklaroi se hetimi përqendrohet te dyshimet për “spiunazh në favor të një vendi të tretë”, si dhe për “pjesëmarrje në një organizatë kriminale”.
Megjithatë, autoritetet belge nuk kanë bërë të ditur detaje të mëtejshme mbi akuzat, ndërsa nuk është zbuluar as emri i vendit që dyshohet se mund të jetë i përfshirë në këtë çështje.
