Sekretari amerikan i Mbrojtjes, Pete Hegseth, ka deklaruar se Shtetet e Bashkuara do të zhvillojnë opsione të reja për parandalimin bërthamor, në kuadër të strategjisë për të përballuar kërcënimet globale.
Gjatë një fjalimi në Komitetin e Shërbimeve të Armatosura të Dhomës së Përfaqësuesve, Hegseth theksoi se administrata e Donald Trump synon modernizimin e plotë të triadës bërthamore të vendit, shkruan A2CNN.
“Ne do të modernizojmë triadën bërthamore dhe do të zhvillojmë mundësi shtesë për të mbështetur parandalimin dhe për të menaxhuar përshkallëzimin”, u shpreh ai.
Sipas tij, Pentagoni nuk do të lejojë që SHBA të mbetet e ekspozuar ndaj kërcënimeve apo shantazhit bërthamor, sidomos në një kohë kur përballet me fuqi të tjera të mëdha që zotërojnë armë të tilla.
Hegseth shtoi gjithashtu se SHBA do të vazhdojë testimin e armëve dhe sistemeve të shpërndarjes bërthamore, duke synuar të ruajë një balancë strategjike me rivalët globalë.
Deklaratat vijnë në një moment tensionesh të larta ndërkombëtare, duke sinjalizuar një fokus të shtuar të Uashingtonit në forcimin e kapaciteteve ushtarake dhe deterrencës bërthamore.
