Një përshkallëzim i ri po regjistrohet në luftën tregtare të Uashingtonit me Otavën, pasi SHBA-të njoftuan se po ndalojnë importin e disa produkteve të qumështit dhe motoçikletave nga Kanadaja, si dhe shumicën e pijeve alkoolike.
Ndalimi i importit do të hyjë në fuqi më 29 shtator dhe vjen menjëherë pasi Kanadaja vendosi tarifa mbi importet amerikane me vlerë 20 miliardë dollarë . Negociatat tregtare midis dy vendeve kanë ngecur që nga gushti.
Trump ka ndërmarrë gjithashtu hapa për të ndaluar produktet kanadeze nga kontratat e mëdha dhe afatgjata të qeverisë amerikane dhe i ka urdhëruar Administratës së Përgjithshme të Doganave të SHBA-së të deklarojë produktet kanadeze të papërshtatshme.
Kryeministri kanadez Mark Carney tha se strategjia e Kanadasë synon ta bëjë vendin më të pavarur dhe u zotua të përshpejtojë përpjekjet. ” Ne do të sigurohemi që asnjë vend të mos na mbajë peng dhe që ne të mund të jetojmë ashtu siç duam “, tha ai.
Përçarja SHBA-Kanada po përmbys një nga marrëdhëniet më të ngushta tregtare në botë. Më 22 gusht, SHBA-të vendosën tarifa prej 50% për rreth 5% të importeve kanadeze, duke e akuzuar Kanadanë për trajtim të padrejtë të industrive amerikane të qumështit, alkoolit dhe automobilave.
Shtetet e Bashkuara dhe Kanadaja kanë pasur mosmarrëveshje për vite me radhë për çështjet tregtare, veçanërisht për tregun e mbrojtur të qumështit në Kanada dhe subvencionet e saj për prodhuesit e drurit të butë. Megjithatë, ato kanë ruajtur marrëdhënie miqësore dhe kanë mbetur aleatë të palëkundur.
Megjithatë, nën presidencën e Trump, marrëdhëniet SHBA-Kanada janë përkeqësuar me shpejtësi . Përveç vendosjes së tarifave për mallrat kanadeze, Trump ka bërë vazhdimisht deklarata provokuese rreth mundësisë që Kanadaja të bëhet shteti i 51-të i SHBA-së. Carney mori detyrën vitin e kaluar pas një fitoreje të papritur politike, duke premtuar se do t’i kundërvihej Trump.
