Presidenti francez, Emmanuel Macron, po përballet me kritika nga sindikatat dhe organizatat për të drejtat e njeriut, pasi qeveria franceze po përshpejton shqyrtimin e një projektligji që synon të detyrojë pjesëmarrësit në protesta të paguajnë për dëmet e shkaktuara nga vandalizmi.
Sipas propozimit, gjobat mund të arrijnë deri në 10 mijë euro. Projektligji parashikon gjithashtu përdorim më të gjerë të dronëve për monitorimin e protestave. Senati francez pritet ta debatojë nismën gjatë kësaj jave.
Prej më shumë se një muaji, në Francë po zhvillohen protesta të nxënësve të shkollave të mesme, të cilët kërkojnë zgjidhje për mungesën e mësuesve, riparimin e ndërtesave të amortizuara dhe ndryshime në platformën e aplikimeve universitare.
Lëvizjes i janë bashkuar sindikata dhe përfaqësues të jelekëve të verdhë, të cilët kundërshtojnë politikat qeveritare. Pakënaqësitë lidhen gjithashtu me rritjen e kostos së jetesës dhe përkeqësimin e shërbimeve publike.
Autoritetet kanë shtuar masat e sigurisë dhe kanë vendosur kufizime për tubimet, pas episodeve të dhunës, plaçkitjeve dhe zjarrvënieve që shoqëruan disa demonstrata të fundit.
Kryeministri Sébastien Lecornu e ka cilësuar projektligjin si “absolutisht të domosdoshëm”, duke argumentuar se ai do të ndihmojë në përballimin e vandalizmit dhe mbrojtjen e pronës publike e private.
Nisma ishte përgatitur fillimisht pas përplasjeve të dhunshme që pasuan fitoren e Paris Saint-Germain ndaj Arsenalit në finalen e Ligës së Kampionëve, në maj.
Ndërkohë, autoritetet kanë kufizuar disa demonstrata, kanë ndaluar grumbullimet pranë shkollave dhe protestat në qendrat e qyteteve, si dhe kanë vendosur shtetrrethime në disa zona.
Përfaqësues të së majtës dhe sindikatat paralajmërojnë se projektligji mund t’i detyrojë qytetarët të heqin dorë nga protestat paqësore, nga frika se do të mbajnë përgjegjësi për dëme që nuk i kanë shkaktuar vetë.
Debati zhvillohet në prag të zgjedhjeve presidenciale të vitit 2027. Marine Le Pen, drejtuese e së djathtës ekstreme dhe e partisë Tubimi Kombëtar, po përpiqet të forcojë imazhin e saj si mbështetëse e rendit dhe e policisë.
Protestat në Francë kanë një traditë të gjatë si mënyrë përmes së cilës qytetarët shprehin kundërshtimin ndaj vendimeve shtetërore, nga reformat e pensioneve deri te ndryshimet në legjislacionin për martesat mes personave të së njëjtës gjini.
