Forcat ajrore amerikane kanë trefishuar numrin e sulmeve ajrore të zhvilluara në Afganistan kundër talebanëve dhe terroristëve të Shtetit Islamik në raport me vitin e kaluar, njoftoi zëdhënësi i forcave amerikane dhe misionit të NATO-s në Afganistan, Bill Salvin.
“Rreth 900 sulme ajrore janë zhvilluar mes janarit dhe prillit, ndërkohë që në të njëjtën periudhë të vitit 2016 ishin më pakë se 300”, deklaroi ai.
Por edhe numri i viktimave civile të shkaktuara nga sulmet ajrore amerikane dhe Afgane u rritën gjithashtu në vitin 2017.
Misioni i OKB-së për Asistencë në Afganistan (UNAMA) e cilësoi këtë rritje si shqetësuese.
Në tremujorin e parë të 2017 72 civilë u vranë dhe 76 të tjerë u plagosën, në krahasim me vetëm tetë të vdekur dhe 21 të plagosur gjatë të njëjtës periudhë të një viti më parë.
Ndërsa gjatë vitit 2016, numri i civilëve të vrarë nga sulmet ajrore u rrit me 99 për qind në raport me vitin 2015, sipas OKB-së./a.m.
