Dy persona kanë humbur jetën nga fruthi në Pensilvani, ndërsa një shpërthim i sëmundjes në shtetin amerikan po i afrohet 400 rasteve.
Departamenti i Shëndetësisë i Pensilvanisë bëri të ditur se të dy viktimat ishin banorë të pavaksinuar të Qarkut Lancaster. Këto janë vdekjet e para të lidhura me fruthin të raportuara në Shtetet e Bashkuara gjatë vitit 2026 dhe të parat në Pensilvani në 35 vjet.
Guvernatori Josh Shapiro paralajmëroi për rrezikun e dezinformimit mbi vaksinat dhe u bëri thirrje prindërve të sigurohen që fëmijët të jenë të vaksinuar.
“Është jetike që çdo prind të dijë se nëse ju ose fëmijët tuaj nuk jeni të vaksinuar, jeni në një rrezik në rritje për t’u prekur nga ky virus shumë ngjitës”, deklaroi Shapiro.
Që nga fillimi i shpërthimit në prill, autoritetet kanë administruar më shumë se 4,100 vaksina MMR, që mbron nga fruthi, shytat dhe rubeola, përmes klinikave të përkohshme.
Shteti ka ofruar gjithashtu udhëzime për personelin shëndetësor mbi trajtimin e rasteve të fruthit, ndërsa në javët e ardhshme pritet të hapen edhe 40 klinika të tjera të përkohshme.
Sekretarja e Shëndetësisë e Pensilvanisë, Dr. Debra Bogen, theksoi se vaksina MMR është e sigurt dhe përbën mbrojtjen më të mirë kundër fruthit.
Ndërkohë, Qendrat Amerikane për Kontrollin dhe Parandalimin e Sëmundjeve (CDC) deklaruan se po bashkëpunojnë me autoritetet shëndetësore lokale dhe shtetërore për të forcuar masat e reagimit dhe për të frenuar përhapjen e virusit.
