Dy persona që kanë shantazhuar një vajzë nga Berati me publikimin e fotove dhe videove intime dërgohen në gjyq nga Prokuroria e Krimeve të Rënda. Kjo e fundit, në datën 17 mars, ka dërguar në gjyq dosjen penale ndaj shtetasve Pandaleimon Zhonga dhe Marjus Doko. Sipas Prokurorisë, ata akuzohen se kanë kryer veprën penale “Shtrëngim me anë të kanosjes për dhënie pasurie”, kryer në bashkëpunim.
Ngjarja, sipas Prokurorisë, ka ndodhur në dhjetor të vitit 2015. Dy të rinjtë akuzohen se kanë kërcënuar një vajzë në Berat se do t’i publikonin në Facebook foto e video intime.
Sipas hetimeve, mësohet se shtetasit Marjus Doko, 19 vjeç, dhe Pandaleimon Zhonga, 20 vjeç, të dy banorë të Beratit, janë arrestuar me akuzën e “Shtrëngimit me anë të kanosjes ose dhunës për dhënie pasurie”, pas denoncimit të bërë nga vajza e dëmtuar dhe prindërit e saj.
Në denoncim, vajza e dëmtuar nga ngjarja ka thënë se dy të rinjtë në bashkëpunim me njëri-tjetrin kanë kërcënuar e kanosur duke përdorur dhunë fizike dhe psikologjike ndaj shtetases A.K.
Prokuroria bën me dije se kërcënimet ndaj vajzës janë bërë edhe në Facebook, duke i kërkuar një shumë prej 300.000 mijë lekësh të vjetër, me qëllim për të mos i publikuar në këtë rrjet disa foto dhe video intime të saj.
Siç bëhet e ditur nga hetuesit, njëri nga djemtë kishte pasur një lidhje intime me vajzën. Gjatë kësaj lidhje, ai kishte arritur ta fotografonte vajzën në situatë intime dhe madje të realizonte edhe një video me të.
Ndërkohë disa muaj pas regjistrimit të videos, i riu bashkë me shokun e tij e ka kërcënuar vajzën duke i kërkuar 300 mijë lekë. Pasi e ka kërcënuar me publikimin e imazhit dhe e ka dhunuar, njëri nga djemtë ka publikuar në Facebook një foto të vajzës ku ajo shfaqej gjysmë e zhveshur.
Pas këtij momenti, e dëmtuara ka shkuar në Polici dhe ka bërë denoncimin për gjobëvënien, ndërsa Policia dhe Prokuroria kanë vënë në pranga dy autorët e ngjarjes.
Pas arrestimit të tyre, hetuesit kanë zbardhur dërguesin e mesazheve në adresë të vajzës, duke sekuestruar edhe telefonin celular të përdorur gjatë krimit. Më pas është marrë në pyetje edhe e dëmtuara, e cila ka treguar rrethanat e gjobëvënies ndaj saj.
Panorama
