Gjergj Bojaxhi, kandidat i Sfida për Shqipërinë, thotë se kjo lëvizje është për njerëzit që ndihen të pakënaqur nga kjo politikë.
Duke folur në aktivitetin për njëvjetorin e themelimit të partisë “SFIDA”, Bojaxhi tha se shqiptarët në këto zgjedhje do të ngrihen mbi të gjitha për shpresë.
“Do të ngrihen ata që ndihen të zhgënjyer nga kjo politikë; do të ngrihen ata që ndihen të gënjyer nga premtimet njëlloj të këtyre politikanëve; por mbi të gjitha, do të ngrihen ata që duan të shohin shpresë për një të ardhme për këtë vend,” u shpreh Bojaxhi.
Ne besojmë se ajo që e mban peng këtë vend nuk është mungesa e potencialit, apo e aftësive të shqiptarëve, tha Bojaxhi, por politika.
“Ajo që e mban peng këtë vend është vetëm mungesa e dëshirës së këtyre politikanëve që ky vend të bëhet. Por ne vendosëm të mos presim më. Pas garës së Tiranës, vendosëm të bashkoheshim, edhe më shumë, për një Sfidë që lind në kryeqytet, por që është e gjithë Shqipërisë,” u shpreh Bojaxhi.
Ermal Hasimja, kandidati i dytë për Tiranën i partisë SFIDA, tha se të gjithë duhet të bëjmë detyrën si qytetarë.
“Duhet që ky mesazh proteste të dalë. Ose je dakord me ta, ose duhet të protestosh. Mënyra më efikase dhe më dinjitoze për të protestuar është të votosh,” u shpreh Hasimja në aktivitetin e një-vjetorit të Sfida për Shqipërinë.
Besa Xhumari, kandidate për Tiranën, përshëndeti aktivitetin.
“Po mblidhemi një vit nga themelimi dhe tani kemi më shumë shpresë. Ka kaluar një vit dhe jemi më shumë. Puna e secilit nga ne ka frymëzuar të tjerë të shprehen dhe të na bashkohen,” tha Besa Xhumari
Kandidati Medlir Mema tha se Sfida për Shqipërinë është një projekt që qytetarët të shprehin zërin e tyre.
“Jemi në një kthesë. Kemi dy elementë që ata nuk i kanë: integritetin dhe kohën. Prej integritetit që kemi, koha do të vërtetojë se qytetarët do të na mbështesin ne. Së bashku, nuk do të mbështesim më politikanët që përfaqësojnë vetëm interesat e tyre personale,” tha Medlir Mema.
Folës të tjerë përfshinë gazetarin Blendi Salaj, Evis Zaja, etj. Sfida për Shqipërinë renditet me numrin 4 në fletën e votimit, me drejtues administrativ Hektor Ruci.
