Asaj që i janë frikësuar më së shumti shqiptarët e Kosovës, e ka thënë shefi i Zyrës për Kosovën në Qeverinë e Serbisë dhe bashkëpunëtori më i afërt i kryeministrit serb, Marko Gjuriç.
Sipas tij, projekti i shtetit të Kosovës, që ai i referohet si projekt i dështuar, duhet të zëvendësohet me projektin e një dialogu të përgjithshëm ndërmjet popullit serb dhe atij shqiptar.
Ideja e shpalosur zyrtarisht nga Gjuriç ekziston që më shumë se dy dekada, kur Millosheviç, më pas edhe Xhinxhiç janë angazhuar që për Kosovën të flasin me Shqipërinë dhe në fund, Kosova e ndarë, pjesa e mbetur, t’i bashkohet Shqipërisë, raporton lajmi.net.
“Projekti i shtetit të rrejshëm në Kosovë, pa marrë parasysh sa miliarda euro janë investuar në të, nuk do të ketë sukses”, ka thënë ai, duke shtuar se shtetin serb e pret lufta e gjeneratave që t’i rikthej interesat e veta.
I pyetur që të komentojë deklaratën e kryeministrit të Shqipërisë, Edi Rama që më nuk ekziston ëndrra për “Shqipërinë e Madhe”, Gjuriç ka thënë se nuk dinë se cilit Ramë t’i besojë.
“A t’i besojë atij Ramës që e tha atë javën e kaluar, apo atij Ramës që para disa muajsh foli për gjëra krejt të kundërta me tash. Në secilin rast, është në interes të Serbisë që të zhvillojë marrëdhënie të mira edhe me Ramën edhe me Shqipërinë. Kjo na duhet edhe për Kosovën dhe për politikanët atje që t’i ulim tensionet”, ka thënë Gjuriç.
Duket se vizita e Ramës në Beograd dhe ideja e shpallur prej tij për pajtim shqiptaro-serb, duke “anashkaluar” Kosovën, i ka dhënë zemër Beogradit që të rinis këtë projekt për zhbërjen e Kosovës si shtet dhe ndarjen e saj. (b.an)
