Në 33 muaj, falë investimeve prej 442 milionë lekë në infrastrukturë dhe pajisje bashkëkohore, Spitali Universitar “Shefqet Ndroqi” në Tiranë po transformohet nga thjesht një sanatorium ku trajtoheshin pacientët me sëmundje të mushkërive, në një Qendër Rajonale Spitalore. Tanimë, këtij spitali mund t’i drejtohen të gjithë ata që vuajnë e kërkojnë trajtim për sëmundjet e brendshme, të zemrës dhe ndërhyrje të kirurgjisë së përgjithshme. Kryeministri Edi Rama, i shoqëruar nga ministri i Shëndetësisë Ilir Beqaj, ishin sot në këtë spital, ku vizitoi disa nga pavijonet e reja të sëmundjeve të ndryshme. Krahas rikonstruksionit të plotë të infrastrukturës, është bërë edhe pajisja me aparaturat më bashkëkohore për reanimacionin e kardiologjisë, hemodinamikës, të imazherisë, fibrogastroskop dhe bronkoskop, etj.
Prof. Dr. Perlat Kapisyzi, Drejtori i spitalit, nënvizoi se sanatoriumi i dikurshëm me kthimin në spital rajonal ka fituar një dimension të ri.
“Spitali ynë universitar “Sheqet Ndroqi” ka rreth dy vjet, i cili nga një spital i sëmundjeve të mushkërive, është kthyer në një spital të sëmundjeve të përgjithshme, spital rajonal dhe spital universitar.”
Me kthimin në spital të përgjithshëm, numri i pacientëve që i drejtohen atij ka rritje të ndjeshme në të gjitha shërbimet. Kjo, sipas ministrit Beqaj, jo vetëm ka lehtësuar fluksin e pacientëve që i drejtohen QSUT-së, por edhe ka shkurtuar kohën e shërbimit dhe shpenzimet, veçanërisht për ata që vijnë nga qytete të tjera. Vetëm në qendrën e imazherisë bëhen 10 ekzaminime në ditë të pacientëve që janë në radhë pritjeje në QSUT. Ndërkohë shtrimet nga urgjenca janë rritur me 3.5% në vitin 2015, pritja e pacientëve me 51.2% dhe operacionet e kirurgjisë së përgjithshme janë rritur me 24%. Që nga shtatori i vitit të shkuar janë kryer 445 procedura të koronarografisë në pacientë që kanë qenë në radhë pritjeje.
“Që nga shtatori vjet, ne ofrojmë këtë shërbim dhe këtu, që na ka ndihmuar shumë për të ulur radhën e pritjes. Me çfarë kemi bërë në QSUT dhe me çfarë kemi bërë dhe këtu, praktikisht, për tre vjet radha e pritjes nga 6 muaj ka ardhur në 30-35 ditë,” – tha ministri Beqaj, gjatë ndalesës në pavijonin e hemodinamikës.
Për Kryeministrin Edi Rama, ky spital është shëmbëlltyra e vizionit të qeverisë për një sistem shëndetësor publik europian dhe konkurrues me atë privat.
“E bëjmë me shumë kënaqësi këtë fotografi familjare me një ekip vërtet mbresëlënës, që ka arritur në një periudhë kohe relativisht të shkurtër të përmbysë një histori të hidhur shumëvjeçare rrënimi të këtij spitali kaq të rëndësishëm dhe jo vetëm kaq, por dhe ta transformojë këtë spital në një shtëpi mikpritëse, me infrastrukturë bashkëkohore dhe më një shërbim të kualifikuar e të përkushtuar ndaj të gjithë atyre që vijnë këtu për t’u vizituar. Nuk është më sanatoriumi i dikurshëm, por është një spital rajonal që është pasqyra e ambicies sonë për një shëndetësi të rilindur, për një shërbim publik shëndetësor që nuk i lë asgjë mangët punës e që konkurron denjësisht me çdo spital privat në Tiranë.”- tha Rama.
Dëshmitarë të transformimit që ka pësuar ky spital u bënë vetë pacientët, teksa takuan Kryeministrin.
“Isha para dy vitesh, krevatet me fibër poshtë. Kushte europiane. Jemi shumë të kënaqur,” – u shpreh njëri prej tyre, të cilit i është dashur të trajtohej edhe më parë në të.
Ndërkohë është në zbatim edhe faza e tretë e investimeve që përfshin investimet në qendrën e ekzaminimeve dhe infrastrukturën e godinave të administratës./a.k
