Agjencia Joniane e Mjedisit, Medias dhe Informacionit (AJMMI) me qendër në Sarandë, në bashkëpunim me Bashkinë Sarandë, përgjatë 3 ditëve (18, 19 dhe 20 gusht) organizon edicionin e pestë kombëtar të Panairit të Suvenireve Turistike me qasje Mjedisore, “Panair Saranda 2016“.
“Panair Saranda 2016” synon promovimin turistik të resurseve të traditës së artizaneve shqiptare në fushën e punimeve te dorës, me realizime të artikujve në lloje të ndryshme materiali si punime në qëndisje, në material leshi, druri, guri, guacka deti, lekure, qeramike, metali, etj.
AJMMI veçoi ndër arritjet e këtij edicioni pjesëmarrjen e mbi 60 subjekteve, artizanë nga Shqipëria dhe hapësirat e tjera të trojeve etnike në rreth 50 pavione, sipas kritereve te paravendosura nga stafi i Panairit. Artizanët shqiptarë sollën pranë njëri-tjetrit në këtë event kombëtar traditën e punëve të dorës nga qytete si Gjirokastra,Saranda, Shkodra, Prizreni, Prishtina, Tirana, Kukësi, Kruja, nga shqiptarë të Malit të Zi, etj,.
Për herë të parë në këtë Panair krahas artizaneve shqiptarë nga Mali i Zi, morën pjesë edhe 5 artizanë me shtetësi malazeze dhe kombësi serbe.
Në pikëpamjen e lëvrimit dhe teknikave të punës së dorës, Panairi përfshiu qëndistarinë e dorës dhe punët në tezgjah, punime në material druri, në lesh, me shtiza, në filigram, në bizhuteri dhe veshje kombëtare, në guacka të qëmtuara nga brigjet e Jonit përmes një larmie teknikash aplikative.etj,
“Panair Saranda 2016“u frekuentua nga shumë vizitorë shqiptarë dhe të huaj, një pjesë e të cilëve ishin edhe blerës të shumë produkteve artizanale sipas traditave të trevave shqiptare./a.m.
