Kryeministri Edi Rama, komisionerja e BE për Zgjerim Marta Kos si dhe liderët e Ballkanit Perëndimor kanë realizuar foton familjare në kuadër të samitit “Plani i Rritjes, rruga jonë në BE” që po mbahet në Tiranë.
Po mbahet në Tiranë samiti “Plani i Rritjes, rruga jonë në BE”, ku liderët e Ballkanit Perëndimor do të ndajnë diskutime për planin e rritjes, integrimin ekonomik dhe transformimin e rajonit drejt Tregut të Bashkimit Europian. Samiti zhvillohet në Pallatin e Brigadave, ky kryeministri Edi Rama priti liderët e Ballkanit Perëndimor dhe komisioneren e BE, Marta Kos. I pranishëm është edhe ambasadori i delegacionit të BE në Tiranë, Silvio Gonzato.
Kreu i qeverisë, në fjalën hapëse të samitit, theksoi rëndësinë e Ballkanit Perëndimor për Evropën. Duke u ndalur te reformat në kuadër të Planit të Rritjes, Rama theksoi se rajoni po ecën nga rreziku në mundësi. Ai theksoi se vendet e rajonit nuk po luten për të hyrë në BE, por po bëjnë detyrat e tyre për t’u bërë pjesë.
