Kryeministri Edi Rama dhe Komisionerja e BE për Zgjerimin, Marta Kos, nisën një konferencë të përbashkët, pas samitit të sotëm që Rama e përshkroi si “të frytshëm për afrimin e rajonit me Bashkimin Evropian”.
Rama theksoi se plani i ri i rritjes shërben si një urë e shpejtë dhe e sigurt drejt tregut të përbashkët evropian, duke përmendur disa nga angazhimet kryesore:
Roaming-u pa tarifa shtesë për qytetarët e Ballkanit Perëndimor, një hap që vlerësohet si domethënës pas heqjes së ngarkesave ekstra për pagesat.
Ndërlidhja me korridoret evropiane, e cila mbetet prioritet dhe do të financohet nga instrumentet e BE.
Transformimi digjital dhe identiteti digjital, që pritet të hyjë në fuqi në fillim të vitit të ardhshëm. Rama sqaroi se identifikimi do të bëhet përmes celularit, duke eliminuar nevojën për karta identiteti dhe pasaporta, dhe do të lehtësojë edhe transaksionet financiare dixhitale.
Aftësimi i zinxhirit të vlerës së BE dhe turizmi, si komponentë që duhet fuqizuar përmes bashkëpunimit rajonal.
Fuqizimi i arsimit të lartë dhe ndërkombëtarizimi i tij, një proces që tashmë ka nisur në Shqipëri dhe që pritet të zhvillohet më tej me mbështetjen e Komisionit Evropian.
Rama theksoi se këto hapa synojnë bashkëpunim më të ngushtë me BE-në, duke e bërë rajonin më të integruar në tregun evropian dhe duke sjellë përfitime konkrete për qytetarët dhe ekonomitë lokale.
