Rusia nuk kursen më as civilët në Ukrainë, duke bombarduar gjerësisht dhe jashtë “etikës” ushtarake.
Ekipet e shpëtimit në Krivyi Rih të Ukrainës vijojnë kërkimet në rrënojat e një qendre tregtare, pas një sulmi të dyfishtë rus që të premten shkaktoi të paktën 16 viktima dhe plagosi më shumë se 130 persona.
Guvernatori i rajonit të Dnipropetrovskit, ku ndodhet qyteti dhe vendlindja e presidentit ukrainas Volodymyr Zelensky, tha se mes të plagosurve janë edhe 22 fëmijë. Sipas tij, 29 persona ndodhen në gjendje të rëndë, përfshirë pesë fëmijë.
Në një përditësim të publikuar të shtunën në mëngjes, autoritetet njoftuan se nëntë persona rezultojnë ende të zhdukur, mes tyre dy fëmijë. Ekipet e emergjencës po vijojnë kërkimet nën rrënoja, me shpresën për të gjetur të mbijetuar.
Presidenti ukrainas Volodymyr Zelensky e dënoi sulmin, duke e cilësuar atë si “absolutisht cinik dhe të neveritshëm”. Sipas tij, një dron i dytë rus goditi qendrën tregtare rreth 30 minuta pas sulmit të parë, duke ngritur dyshime se objektivi mund të ketë qenë edhe personeli i shpëtimit.
“Sulme të tilla nuk janë gjë tjetër veçse akte terroriste”, deklaroi Zelensky, ndërsa kërkoi nga komuniteti ndërkombëtar që Rusia të mbahet përgjegjëse dhe paralajmëroi se Ukraina do të përgjigjet.
Në një tjetër sulm të raportuar në rajonin jugor të Mykolaivit, të paktën katër persona, përfshirë tre fëmijë, u vranë nga një sulm me dron rus. Një grua mbeti e plagosur, sipas mediave shtetërore ukrainase.
