Ashtu siç edhe pritej, Rusia është hakmarrë me po të njëjtën mënyrë me 23 vendet që i dëbuan diplomatët, mes tyre edhe Shqipëria.
Rusia ka reaguar zyrtatisht dhe ka shpallur ‘non grata’ dy diplomatë shqiptarë nga ambasada në Moskë. Ky reagim i Kremlinit vjen si kundërpërgjigje pas shpalljes “non grata” të dy diplomatëve rusë në Tiranë.
Dy diplomatët që u dëbuan nga Shqipëria janë Vladislav Filipov, atashe ushtarak dhe Alexey Nikolaevich Balashov, sekretar i parë i ambasadës së Rusisë në Tiranë.
Ashtu siç informoi më herët ekskluzivisht javanews, në 30 mars ministria e jashtme ruse ka njoftuar zyrtarisht se ka thirrur të gjithë titullarët e misioneve diplomatike të vendeve që “ndërmorën akte armiqësore” ndaj Rusisë, pas rastit Skripal në Britaninë e Madhe.
Ministria e Jashtme e Rusisë tha se ka njoftuar ambasadorët e shumicës së vendeve që urdhëruan dëbimin e diplomatëve rusë se një numër i barabartë diplomatësh të tyre janë shpallur persona non grata.
Rusia njoftoi dje se do të dëbonte 150 diplomatë të huaj, një numër i barabartë me numrin e diplomatëve rusë që u dëbuan nga vendet anëtare të BE, NATO dhe SHBA, 60 prej të cilëve diplomatë amerikanë
a.ç
