KB-ja i kërkoi sot Rusisë dhe Truqisë që të evitojnë gjakderdhjet në provincën siriane të Idlebit, rajoni i fundit që kontrollohet nga rebelët, ndërkohë që avionët rusë kanë rifilluar bombardimet e tyre pas një pushimi prej 22 ditësh.
Moska, mbështetësi më i fuqishëm i Damaskut, njoftoi, nëpërmjet zëdhënësit të Kremlinit, Dmitri Peskov se “ushtria siriane po përgatitet të zgjidhë problemin e terrorizmit në provincën e Idlebit”.
“Një nyje e re e terrorizmit është krijuar aty (…) dhe kjo shkakton një destabilizim të përgjithshëm të situatës”, tha ai për median, dy ditë nga një samit ruso-turko-iranian për Sirinë që do të zhvillohet në Iran.
Kjo deklaratë vjen pasi presidenti amerikan, Donald Trump paralajmëroi dje Sirinë, Rusinë dhe Iranin kundër një ofensive në Idleb, duke deklaruar se “një operacion i tillë mund të shkaktojë një tragjedi njerëzore”. /b.d
