Një gjykatë në Moskë ka gjobitur Google, Telegram dhe Microsoft me një total prej 11.1 milionë rubla, rreth 130 mijë dollarë, për moslargimin e përmbajtjeve të ndaluara nga platformat e tyre.
Gjykata e Qarkut Taganski vendosi që Google dhe Telegram të paguajnë nga 3.8 milionë rubla secila, ndërsa Microsoft u gjobit me 3.5 milionë rubla.
Sipas autoriteteve ruse, kompanitë kanë shkelur legjislacionin duke mos hequr përmbajtjet e konsideruara të ndaluara nga platformat e tyre.
Në Rusi, Google, Telegram, Microsoft, Apple, TikTok dhe kompani të tjera të huaja teknologjike janë përballur më herët me gjoba dhe kufizime për mosrespektimin e kërkesave të autoriteteve ruse lidhur me përmbajtjet online.
Vetëm ndaj Google, gjobat e vendosura që nga fundi i vitit 2021 kanë kaluar 29 miliardë rubla, ndërsa detyrimet e papaguara të kompanisë në Rusi raportohet se i kalojnë 20 miliardë rubla.
Ndërkohë, Telegram është përballur edhe me kufizime në Rusi, ndërsa gjobat ndaj platformës gjatë gjashtë muajve të parë të këtij viti kanë kaluar 100 milionë rubla.
