“Ruani ritmin e reformave!”/ Gonzato: Shqipëria do të mbyllë negociatat me BE deri në 2027

Në një moment kur Kuvendi ka peshën më të madhe për të përmbushur 101 detyrat për procesin e anëtarësimit të Shqipërisë në BE, ambasadori i BE-së, Silvio Gonzato, në lançimin e një projekti të ri për të forcuar rolin parlamentar në negociatat me BE-në, kërkoi ruajtjen e këtij ritmi të reformave deri në mbylljen e grupkapitujve në fund të vitit 2027.

“Ndërsa ecin përpara negociatat, veçanërisht në këtë moment kaq kyç në negociata, për të përmbushur objektivin ambicioz që i ka përcaktuar vetes Shqipëria, pra mbyllja e negociatave deri në fund të vitit 2027, Shqipëria duhet të ruajë këtë ritëm reformash, por ky ritëm nuk duhet të vijë në dëm të procesit të miratimit dhe zbatimit të këtyre reformave. Reformat që kanë lidhje me BE-në duhet të jenë të përgatitura mirë, të konsultuara plotësisht dhe të vihen në zbatim tërësisht, për të sjellë përfitime në jetën e qytetarëve.”

I sulmuar ashpër nga opozita, megjithatë, ambasadori i BE-së kërkoi dialog mes partive politike.
Shembulli më i mirë, sipas tij, është dialogu më i fundit mes PS-së dhe PD-së për rregulloren e re, ku pavarësisht kundërshtimeve të opozitës, mazhoranca socialiste vendosi të zbatojë vendimin e Gjykatës Kushtetuese për të arritur një draft konsensual.

“Kuvendi duhet të nxisë dialogun ndërpartiak. Meqenëse po flasim për këtë dialog, përgëzojmë dialogun që po bëni për ndryshimet në rregullore. Kjo qasje konstruktive është shumë e rëndësishme për legjitimitetin, sepse institucionet demokratike nuk funksionojnë vetëm me mazhorancën në votim, por me procedura të parashikueshme.”

Në fazën finale të anëtarësimit në BE, Gonzato kërkoi kontributin e të gjithëve — qeverisë, opozitës dhe shoqërisë civile — për të ndihmuar procesin, si dhe garantoi se delegacioni europian në Tiranë mbetet i përkushtuar për të dhënë ndihmën që Shqipëria të arrijë objektivat e saj.