Shqipëria synon të kthejë industrinë minerare në një sektor modern, konkurrues dhe të integruar me tregun evropian. Ky është objektivi i Strategjisë Kombëtare Minerare 2026–2040, e prezantuar nga Ministria e Infrastrukturës dhe Energjisë, ku fokusi kryesor mbetet zhvillimi i lëndëve të para kritike dhe teknologjive të gjelbra.
Dokumenti afatgjatë mbështetet në tre shtylla kryesore: Strategjinë Kombëtare për Zhvillim dhe Integrim 2030, Aktin Evropian për Lëndët e Para Kritike dhe Strategjinë Kombëtare të Specializimit të Mençur 2025–2030. Përmes kësaj strategjie, qeveria synon të orientojë sektorin minerar drejt inovacionit, dixhitalizimit dhe modernizimit teknologjik.
Drejtori i Drejtorisë së Programeve dhe Zhvillimit të Industrisë dhe Minierave, Dhori Dapi, deklaroi se strategjia krijon bazat për një industri minerare më tërheqëse për investimet dhe më të përafruar me standardet e Bashkimit Evropian.
“Kjo strategji i jep industrisë minerare shqiptare një drejtim të qartë dhe afatgjatë, në përputhje me standardet evropiane. Ajo synon rritjen e vlerës së shtuar, forcimin e eksplorimit gjeologjik dhe modernizimin teknologjik në funksion të lëndëve të para kritike”, u shpreh Dapi.
Strategjia parashikon rritjen e eksplorimit dhe rivlerësimin e rezervave minerale, zhvillimin e kapaciteteve për përpunim dhe rafinim brenda vendit, si edhe rikuperimin e metaleve nga mbetjet historike minerare.
Një tjetër objektiv është dixhitalizimi i plotë i të dhënave gjeologjike, forcimi i sigurisë teknike në industri dhe ulja e emetimeve të gazrave serrë përmes standardeve më të avancuara mjedisore. Dokumenti synon gjithashtu rigjallërimin e arsimit profesional dhe kërkimit shkencor në fushën e gjeologjisë dhe minierave.
Sipas Dapit, strategjia synon ta pozicionojë Shqipërinë si një qendër rajonale për mineralet strategjike, duke mbështetur tranzicionin e gjelbër dhe furnizimin e qëndrueshëm me lëndë të para për ekonominë evropiane.
