Më shumë se gjysma e vendeve dhe territoreve në botë renditen tashmë në kategoritë ”të vështira” ose ”shumë serioze” për lirinë e medias, për herë të parë në historinë 25-vjeçare të këtij vlerësimi, bëri të ditur organizata “Reporters Without Borders” (RSF) në raportin e saj të publikuar sot.
Sipas indeksit vjetor të lirisë së shtypit, vetëm shtatë vende në botë konsiderohen se ofrojnë një mjedis ”të mirë” për gazetarët, duke përfaqësuar vetëm 1% të popullsisë globale.
RSF thekson se rënia më e madhe globale këtë vit është regjistruar në aspektin ligjor, pasi gazetaria po kufizohet gjithnjë e më shumë përmes ligjeve që justifikohen me luftën kundër terrorizmit ose mbrojtjen e sigurisë kombëtare.
Në krye të renditjes mbetet Norvegjia për të dhjetin vit radhazi, e ndjekur nga Holanda dhe Estonia.
Në fund të listës vazhdon të renditet Eritrea, ndërsa ndër performuesit më të dobët përfshihen edhe Koreja e Veriut dhe Kina.
Ndërkohë, Siria shënoi përmirësimin më të madh, duke u ngjitur nga vendi i 177-të në të 141-in pas rënies së regjimit të Bashar al-Assad në fund të vitit 2024 dhe ndryshimeve politike që pasuan.
Në të kundërt, Nigeria regjistroi rënien më të madhe, duke zbritur me 37 vende në pozicionin e 120-të.
Të 19 vendet e para në renditje janë evropiane.
Mes tyre, Gjermania renditet në vendin e 14-të, tre pozicione më poshtë se një vit më parë, por ende në kategorinë ”e kënaqshme”.
RSF vëren një klimë gjithnjë e më armiqësore për gazetarët në Gjermani, duke përfshirë abuzimin online, kërcënimet, fushatat shpifëse dhe rritjen e mosbesimit.
Gazetarët që mbulojnë tema të ndjeshme, si ekstremi i djathtë apo lufta në Gaza, përballen gjithnjë e më shumë me presion, debate të ashpra dhe frikë nga ekspozimi publik.
Ndërkohë, SHBA-ja ra me shtatë vende, duke u renditur në vendin e 64-të.
RSF përmend dhunën ndaj gazetarëve nga policia dhe agjentët e Shërbimit të Emigracionit dhe Doganave (ICE), si dhe shkurtimet në mediat ndërkombëtare të financuara nga SHBA.
Indeksi i RSF vlerëson 180 vende dhe territore duke marrë në konsideratë sigurinë, kontekstin politik, kuadrin ligjor dhe kushtet ekonomike e shoqërore që ndikojnë në lirinë e medias.
