Një 55-vjeçar u kap nga Policia Rrugore Tiranë i dehur në timon, teksa nga kontrolli i mëtejshëm fizik, i mjetit dhe i banesës, iu zbuluan një sasi droge kokainë dhe dy thika.
Specialistët për Hetimin e Krimeve të Komisariatit të Policisë Nr. 4, njoftuan sot (18 Shkurt) se arrestuan në flagrancë P. H., 55 vjeç.
“I dyshuari u konstatua duke drejtuar automjetin, në gjendje të dehur. Gjatë kontrollit fizik, kontrollit në automjetin dhe në banesën e tij, shërbimet e Policisë gjetën dhe sekuestruan një sasi lënde të dyshuar narkotike kokainë dhe dy mjete prerëse”, thuhet në njoftimin zyrtar.
Hetimet e mëtejshme i kaluan Prokurorisë, për të verifikuar përfshirjen e tij të mundshme, në ndonjë grup të shitjes së lëndëve narkotike.
