Rrëfimi i ish-studentit që kaloi në kampin gjerman nga Greqia dhe Italia
Ish-studenti i psikologjisë tregon nga një kamp gjerman, të gjitha peripecitë e jetës, nga fakulteti në Tiranë, tek emigrimi në Itali apo Greqi dhe më pas kalimi për në Gjermani, për një shpresë për jetën. Klodjan Cara, 21 vjeç, ka rrëfyer për televizionin “Volksfreund” të gjithë kalvarin e tij.
Në kampin Pitburg, ai ka dhënë një intervistë, bashkë me disa azilkërkues të tjerë nga Siria dhe vende të tjera. Media gjermane shkruan se “shumica e njerëzve nga Kosova, Shqipëria, Siria dhe nga vende të tjera, që janë në një kamp refugjatësh në aeroportin Bitburg, janë të mërzitur. Ata thonë se ka shumë pak mësime gjermane dhe se procedura e azilit është e gjatë.
Në mënyrë që t’i shpëtojnë luftës apo varfërisë, ata kanë lënë çdo gjë pas dhe nisën rrugën për në Gjermani, me shpresën e një jete më të mirë. Ndërkohë, 347 refugjatë jetojnë në qytet-tendë në aeroportin Bitburg. Shumica vjen nga Ballkani, por edhe refugjatët e luftës nga Afganistani apo Siria janë atje”. Për shqiptarin, shkruhet se “21-vjeçari Klodjan Carja është i frustruar.
Ai iku nga Shqipëria sepse nuk gjeti punë. Ish-studenti i sociologjisë thotë se sulmet në supermarkete janë të përditshme. Më parë ai kishte punuar nga tre muaj, çdo vit, në Itali ose Greqi, për të gjetur para për studimet në Shqipëri”. Carja thotë se “unë nuk kisha asnjë alternativë, vetëm të shpëtoja në Gjermani.
Për pesë javë kam jetuar në qytet-tendë në aeroport. Pse gjermanët pranojnë që ne të jetojmë këtu në tenda pa një çati mbi kokë? Nuk është bukur këtu, mërzitem”. Ai duhej të presë deri në tetor për intervistën me autoritetet. Atëherë ai ka një takim me Zyrën Federale për Migracionin në Trier, në të cilën ai mund të shpjegojë kërkesën e tij për azil. “Unë dua që të punoj, pa marrë parasysh se çfarë dhe të mësoj gjermanisht. Duhet të paktën dy orë mësim gjermanisht në ditë”.
